Bu fikirləri Milli Məclisin deputatı Könül Nurullayeva bildirib.

Deputat vurğulayıb ki, videokonfrans tələb olunan yeni yanaşmaların müzakirəsi üçün açılan ilk beynəlxalq diskussiya idi. Müzakirələr zamanı səslənən fikirlər, dövlətimizin başçısına ünvanlanan suallardan da aydın göründü ki, nüfuzlu ictimai-siyasi şəxslər Azərbaycanın ərazi bütövlüyünün bərpasını ədalətin bərpası kimi dəyərləndirirlər. “Yeni əməkdaşlıq mühitində Azərbaycanın təşəbbüsləri yüksək qiymətləndirilir. Otuzillik münaqişənin nəticələrinə gəlincə, bu diskussiya klubunun üzvləri də etiraf edirlər ki, işğal Ermənistanı bir neçə onillik geri atıb. Yeni mərhələdə də Ermənistanın zaman itirməsi bu ölkə üçün daha böyük faciələrin başlanğıcı olacaq. Azərbaycan isə Ermənistanla sülh razılaşması üzərində işə başlamağa hazırdır, bunun üçün sərhədlərin delimitasiyasına ehtiyac duyulur. Sadəcə, Ermənistan rəhbərliyinin gələcəyə baxışı adekvat olmalıdır”, - deyə o qeyd edib.

K.Nurullayevanın sözlərinə görə, Nizami Gəncəvi Beynəlxalq Mərkəzinin tribunasından verilən əsas mesajlardan biri revanşizm meyillərinin sağlam düşüncəyə və inteqrasiyaya mane olmasından ibarət idi. Bu günün əsas reallığı nadir əməkdaşlıq formatının yaranmasını şərtləndirən Zəngəzur dəhlizinin reallaşması istiqamətində çalışmaqdır. Çünki bu dəhliz regional iqtisadi əlaqələri, kommunikasiyanı gücləndirməklə yanaşı, həm də sözün bütün mənalarında Ermənistanın son şansıdır. Deputat, həmçinin qeyd edib: “Konfrans iştirakçılarının qənaəti belədir ki, Ermənistan və erməni xalqı bu şansı mütləq dəyərləndirməlidir. Xüsusilə, İtaliyanın keçmiş xarici işlər naziri və Avropa İttifaqının sabiq komissarı Franko Frattininin “Ermənistanda yaşayan sadə insanların daxili siyasi təbliğat səbəbindən təcrid olunmalarından, Qafqazın qalan hissəsi və onun hüdudlarından kənarda yaxşı əlaqələrin onların maraqlarına tam uyğun olmasından bəlkə də xəbərləri yoxdur” fikrini qeyd etmək lazımdır””.

Qeyd edilib ki, Ermənistan cəmiyyətindəki ab-hava bu cür düşünməyə əsas verir. Bununla belə, Rumıniyanın sabiq baş naziri Petre Romanın da söylədiyi kimi, Azərbaycan Prezidentinin Müzəffər Lider kimi erməni xalqı üçün təəssüflənməsi həqiqətən də bir körpüdür. Bu, barışıq istiqamətində körpü rolunu oynaya bilər. Təbii ki, qarşı tərəf bunu düzgün dəyərləndirməlidir.