Fact-info.az-ın məlumatına görə bunu Trend-ə Milli Məclisin deputatı Aydın Hüseynov deyib.

Deputat bildirib ki, bu işlər başa çatdırıldıqdan sonra regionda yeni bir mərhələ başlayacaq, ölkəmizin nəqliyyat-logistika və tranzit imkanları xeyli artacaq:

“Əlbəttə bütün bu işlər Azərbaycanı yeni nəqliyyat qovşağına çevirir. Bildiyiniz kimi 10 noyabr sazişinin əsas məqamlarından biri də regionda kommunikasiyaların açılmasıdır. 44 günlük Vətən müharibəsində qələbə nəticəsində işğaldan azad edilmiş ərazilərin ölkənin ümumi iqtisadiyyatına reinteqrasiyası, yeni beynəlxalq və regional nəqliyyat-logistika dəhlizlərinin imkanlarından faydalanmaq imkanı yaradacaq.

Bunlardan ən önəmlisi olan Naxçıvan Muxtar Respublikası ilə Azərbaycanın digər hissəsi arasında nəqliyyat kommunikasiyalarının bərpa edilməsi regionda yeni mərhələnin başlanmasına zəmin yaradır”.

Deputat vurğulayıb ki, Naxçıvanla kommunikasiyanın bərpa edilməsi Azərbaycana hən iqtisadi, həm də siyasi baxımdan böyük dividentlər gətirəcək: “Əvvəla Naxçıvanla Azərbaycanın əsas hissəsi arasında dəhlizin yaradıması qardaş Türkiyədən Orta Asiyaya uzanan quruyolun təmin edilməsinə imkan verəcək. Həmçinin bu yol Türkiyə ilə Rusiya arasında yeni kommunikasiyanı təmin edəcək.

Bu amil eyni zamanda Azərbaycan-Türkiyə iqtisadi əlaqələrinin artmasına, yük daşınmalarının daha asan və rahat şəkildə həyata keçirilməsinə səbəb olacaq. Azərbaycanın tranzit ölkəsi kimi əhəmiyyətinin artması ilk növbədə ölkəmizə böyük gəlirlər gətirəcək, yeni iş yerlərinin açlımasına səbəb olacaq, ümumilikdə iqtisadi inkişafımıza mühüm töhfə verəcək”.

Deputat qeyd edib ki, eyni zamanda, işğaldan azad edilmiş ərazilərdə yeni hava limanlarının inşası ölkəmizin hava nəqliyyatı baxımından da tranzit ölkə kimi əhəmiyyətini artıracaq: “Eyni zamanda yeni hava limanları ölkəmizə sərnişin və turist axınını artıracaq, həmçinin ölkə daxilində sərnişinlərin hərəkətini asanlaşdıracaq. Eyni zamanda yeni hava limanları Azərbaycanın ixrac potensialını xeyli artırmış olacaq. Belə ki, həm işğaldan azad edilmiş ərazilərimizdə, həm də yaxın regionlarda istehsal olunan məhsulların xaricə ixracı üçün yeni hava limanlarnın rolu böyük olacaq.

Qafqaz-Asiya-Avropa regionlarında siyasi-iqtisadi, mədəni-humanitar mənzərənin dəyişməsinə ciddi şəkildə təsir göstərəcəkdir. Eyni zamanda, zəngin iqtisadi resursları, təbiəti, turizm potensialı, transnəqliyyat və logistika imkanları, iqlim xüsusiyyətləri ilə Azərbaycan beynəlxalq investisiya və cəlbedici turizm zonasına çevrilmək imkanlarına malik olacaqdır.

Bundan əlavə yeni nəqliyyat infrastrukturu Azərbaycanın etibarlı siyasi güc mərkəzi kimi regional nəqliyyat-logisitika qovşağında aparıcı rol oyanamaqla mövqelərini daha da gücləndirəcək, iqtisadi və sərmayə resurslarının şaxələndirilməsini təmin edəcək”.