Ermənilərin azərbaycanlılara qarşı törətdikləri soyqırımıların məqsədi Bakı və Abşeronu türklərdən təmizləmək olub.

Bunu millət vəkili, tarixçi Musa Qasımlı 1918-ci il 31 Mart azərbaycanlıların soyqırımı ilə əlaqədar danışarkən deyib.

O bildirib ki, ermənilərin törətdikləri kütləvi qırğınmların miqyası 1917-ci ilin payızından Cənubu Qafqazda başlayıb: "1918-ci ildə isə ermənilər Cənubi Azərbaycan ərazisində qırğınlar törədib. Onlar Bakı neftini əldə saxlamaq istəyirdilər. Məqsədləri isə Bakıya nəzarəti ələ keçirməklə Orta Asiyaya nəzarət etmək idi. Təbii ki, onlar məqsədlərinə çata bilmədilər. Azərbaycan özünün müstəqilliyini elan etdi və erməni daşnaklarının niyyəti baş tutmadı. O dövrün ingilis və Amerika sənədlərində göstərilib ki, həmin soyqırımıda Bakının 4/1-i öldürülüb. O zaman Bakıda təqribən 280-300 min nəfər əhali yaşayırdı. Onun 80-100 min nəfəri azərbaycanlı, müsəlman idi. Onların dörddə biri öldürüldü. Bu da 20-25 min nəfər edir".

Musa Qasımlı qeyd edib ki, bu gün Azərbaycanın güclü ordusu, güclü dövlətinin sayəsində işğal altında olan Azərbaycan əraziləri işğaldan azad edilib: "Bu gün Şuşa azaddır, Qarabağ azaddır".(Trend)