Bunu AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu deyib.

H.Babaoğlu bildirib ki, üçtərəfli bəyanatda əksini tapan 9 maddəlik bəndlərin icrası uğurla həyata keçirilməkdədir: “Prosesin ən çətin və mürəkkəb mərhələsi artıq geridə qalıb. Üçtərəfli bəyanata əsasən, noyabrın 10-dan sonra 20 gün müddətində Azərbaycanın üç rayonunun qrafik təqviminə uyğun olaraq işğaldan azad olunması vaxtında yerinə yetirildi. Yəni, dekabr ayının 1-ə qədər Azərbaycan bir güllə belə atmadan, heç bir itki vermədən işğal edilmiş torpaqlarının qalan hissəsini də azad etdi.

Deputatın sözlərinə görə, ikinci mürəkkəb və strateji məsələ Azərbaycanın Naxçıvanla birbaşa kommunikasiyalarını bərpası məsələsidir ki, bu da artıq icra olunmaqdadır. Üçüncü məsələ isə Türkiyə-Rusiya ortaq nəzarət qərərgahının yaradılması idi ki, bu da artıq öz həllini tapıb. H.Babaoğlu qeyd edib ki, hazırda erməni icması daxilində silahlıların və terrorçuların təmizlənməsi, eləcə də Ermənistan silahlılarının erməni icmasının kompakt yaşadığı ərazilərdən çıxarılması prosesi gedir. Azərbaycan tərəfi bu məsələyə ciddi nəzarət edir və son nəticə əldə edilənə qədər də bu nəzarət davam edəcək.

“Məcburi köçkünlərin öz doğma torpaqlarına qaytarılması istiqamətində işlər görülür və ən optimal müddətdə bu məsələ də öz həllini tapacaqdır. Qarşıdakı mərhələdə isə Laçın şəhərinə girmədən yeni nəqliyyat koridorunun yaradılması istiqamətində işlər görüləcək. Beləliklə, mənzərə onu deməyə imkan verir ki, hər şey Azərbaycanın nəzarəti altındadır və kiçik insidentlər istisna olmaqla, üçtərəfli bəyanatda əksini tapan müddəalar uğurla icra olunur.