Filmdə Azərbaycanın rəmzlərindən biri olan Qarabağ atlarından bəhs olunur. “Unicorn Challenge” kino şirkətinin istehsalı olan filmin rejissorları Anar Ömərov və Ava İsmayılovadır. Rolları Azərbaycan və Rusiya aktyorları ifa edirlər.

Filmin yaradıcıları latış rəssam Datse Ştrausun Qarabağ atlarına sevgisi vasitəsilə tamaşaçılara bu nadir at cinsi barədə danışır, eyni zamanda, Azərbaycanın qədim Qarabağ torpağından bir daha söhbət açırlar. Əsas məqsəd isə kökü kəsilməkdə olan bu at cinsini yaşatmağın vacibliyini dünyaya çatdırmaqdır.

Rəssam Datse Ştraus bir müddət Azərbaycanda yaşayıb. Onun nadir Qarabağ atlarına sevgisi silsilə rəsm əsərlərinin ərsəyə gəlməsi ilə nəticələnib. Datse Ştrausun rəsmlərindən ibarət sərgilər müxtəlif şəhərlərdə, o cümlədən Bakıda və Moskvada da təşkil olunub. Rəssam tamaşaçılarına Qarabağ atlarının möhtəşəmliyi, şahanəliyi, fərqliliyini nümayiş etdirməklə sanki bu məşhur atların qan yaddaşında qalmış qəhrəmanlıq tarixinin dirçəlişinə işarə edir.

Filmin rejissoru Ava İsmayılova bu mövzuya müraciətlə Qarabağ atlarının sayının azalmasına diqqət çəkmək niyyətində olduğunu qeyd edib. Filminin “Datse” adlandırılmasını isə rejissor rəssam Datse Ştrausun Azərbaycan mədəniyyətinə, Qarabağın tarixinə sevgi və rəğbəti ilə əlaqələndirib. A.İsmayılova gələcəkdə bu mövzuda tammetrajlı filmin də çəkiləcəyini vurğulayıb.

Təqdimatın təşkilatçısı Dəmirəl Sultanzadə 2019-cu ildə Moskvada keçirilən “Ekviros” sərgisində ilk dəfə Qarabağ atlarının təqdim olunduğunu qeyd edib. Onun fikrincə, sərgidə 300-dən çox at cinsi nümayiş edilsə də, Qarabağ atları tamaşaçıların xüsusi marağına və heyrətinə səbəb olmuşdu. Qarabağ atlarını dünyaya daha çox tanıtmaq və bu barədə film çəkmək ideyası da məhz o zaman yaranıb. Filmin başlıca qayəsi Qarabağ atlarını yaşatmağın tariximiz və gələcəyimiz üçün nə qədər önəmli olduğuna diqqəti cəlb etməkdir.