Müstəqil dövlətin mövcud olmadığı dövrlərdə azərbaycanlıları bir xalq kimi qoruyan, assimilyasiya olunmağa imkan verməyən Azərbaycan mədəniyyəti, Azərbaycan dili, milli mənəvi dəyərlər olub. Azərbaycan dilinin və mədəniyyətinin qorunub saxlanılması və inkişaf etdirilməsi həm də müstəqilliyimizin, vahid dövlətçilik ənənələrimizin, milli birliyimizin ən başlıca rəmzlərindən biridir.

Bu fikirləri AZƏRTAC-a açıqlamasında Milli Məclisin beynəlxalq münasibətlər və parlamentlərarası əlaqələr komitəsinin sədr müavini, YAP-ın Beynəlxalq əlaqələr şöbəsinin müdiri Sevinc Fətəliyeva bildirib.

“Böyük xalqın zəngin dili olmalıdır”, - deyən S.Fətəliyevanın sözlərinə görə, bu gün dünyada 50 milyondan çox insan üçün Azərbaycan dili ana dilidir. Azərbaycan dili və mədəniyyəti özündə milli və bəşəri dəyərləri də ehtiva edir. Prezidenti İlham Əliyev və Birinci vitse-prezident Mehriban Əliyeva mədəni irsimizin, dilimizin qorunması və təbliği baxımından mühüm tədbirlər həyata keçirir. Milli-mədəni irs nümunələrinin tanıdılması əsas prioritetlərdən biri kimi qalmalıdır. Azərbaycanda dini abidələr də xüsusi olaraq qorunur və qorunacaq. Prezident İlham Əliyevin göstərişi ilə bütün əsas dini abidələr təmir olunub. Bir çox dini abidələr, o cümlədən Heydər məscidi tikilib. Digər məscidlər tarixi simaları qorunmaqla əsaslı təmir edilib. Dünyanın ən qədim məscidlərindən biri olan, 743-cü ildə inşa edilmiş Şamaxı Cümə məscidi yenidən qurulub. Xristian dini abidələri, alban kilsələri, o cümlədən Nic qəsəbəsindəki kilsə və Kiş kilsəsi təmir edilib.

“Yaradılacaq yeni infrastruktur Qarabağı bütün regionun mədəni mərkəzinə çevirəcək. Dövlətimizin başçısının tapşırığına əsasən, Füzulidə beynəlxalq aeroport tikiləcək. Oradan Şuşaya məsafə də yaxındır. Füzuli beynəlxalq aeroportunun tikilməsi xarici qonaqların Şuşaya dəvət edilməsi üçün daha geniş imkanlar yaradacaq. Çünki Füzuliyə gəlib oradan qısa müddət ərzində Şuşaya getmək mümkün olacaq. Eyni zamanda, dövlət başçısı tərəfindən Şuşanın Azərbaycanın mədəniyyət paytaxtı elan edilməsi təqdirəlayiqdir. Şuşa tarixdə olduğu kimi, bu gün də bütün regionun mədəni paytaxtına çevrilməlidir. İşğaldan azad edilmiş ərazilərdəki tarixi abidələrin əsl siması bərpa olunmalıdır. Şuşa şəhərinin Azərbaycan mədəniyyətinin paytaxtı elan edilməsi qeyd olunan hədəflərə nail olmağımızı sürətləndirəcək”, - deyən S.Fətəliyeva əlavə edib ki, multikultural dəyərlər Azərbaycan milli mədəniyyətinin ayrılmaz hissəsidir.

Deputat vurğulayıb ki, Azərbaycanda yaşayan bütün xalqların milli mədəniyyətinin qorunması strateji əhəmiyyət kəsb edir. Bu gün Qarabağ bölgəsində yaşayan ermənilər ancaq Azərbaycan dövləti çərçivəsində normal yaşaya bilərlər.