Bu sözləri AZƏRTAC-a müsahibəsində İstanbul Türkiyə-Azərbaycan Dərnəyinin sədri Səfər Qaraqoyunlu bildirib.

O deyib: “Çox təəssüf ki, bütün dünyanın gözü qarşısında Azərbaycan torpaqlarının 20 faizi 1992-ci ildən başlayaraq haqsız yerə işğal edildi. Uzun illər, ilk olaraq Azərbaycanın ulu öndəri Heydər Əliyev, sonra isə bu qələbəyə tarixi imzasını atan Prezident İlham Əliyev problemin qan tökülmədən həll olunması üçün böyük mübarizələr apardılar. İnsan haqlarından danışanlar ötən bu otuz il ərzində günahsız insanların öldürülməsinə səssiz qaldılar. Azərbaycan xalqının səbrinin daşmasına baxmayaraq, yenə də Azərbaycan Prezidenti İlham Əliyev dəfələrlə problemin sülh yolu ilə həll olunması istiqamətində müxtəlif bəyanatlar verdi. Bu, dünyada misli görünməmiş humanizm nümunəsi idi. Lakin Ermənistan tərəfi daima müharibə yolunu seçdi və bilərək təmas xəttindən kilometrlərlə uzaqlıqda yerləşən yaşayış yerlərini hədəf aldı. Təbii ki, bunun bir qarşılığı olacaqdı. Azərbaycan Silahlı Qüvvələrinin Ali Baş Komandanı İlham Əliyev verdiyi strateji və çox vacib qərarla türk millətinin müstəqillik və Vətən uğrunda nələr edə biləcəyini işğalçı Ermənistan və bütün dünyaya göstərdi. İki ildə itirilən torpaqlar 44 gün ərzində geri alındı. Bu tarixi qələbə ilə yanaşı, Naxçıvanla Azərbaycanın digər bölgələri arasında bağlantı yolu əldə edildi. Bu, müharibənin əsl qəhrəmanları bir an belə tərəddüd etmədən Vətən uğrunda canından keçən şəhidlərimiz, qazilərimiz, şanlı Azərbaycan Ordusu və bu qəhrəman Ordunun Ali Baş Komandanı, tarixə adını qəhrəman lider kimi yazdıran Azərbaycan Prezidenti İlham Əliyevdir. Bu vəsilə ilə Vətən bölünməz deyən şəhidlərimizə Allahdan rəhmət, qazilərimizə isə şəfa diləyirəm.

Qələbən mübarək, can Azərbaycan”.