Terrorizmi dövlət siyasətinə çevirən Ermənistan bu gün vətəndaş müharibəsi girdabında çabalayır. Faşizm ideologiyasına sadiq qalan, günahsız insanları qətlə yetirməklə yola çıxan təcavüzkar və işğalçı Ermənistan hakimiyyətinin rəhbərləri cəfəng bəyanatları, təxribat xarakterli addımları ilə ölkəni hərbi, iqtisadi böhran məngənəsinə sürükləməkdə davam edir.

Bunu AZƏRTAC-a açıqlamasında Milli Məclisin deputatı Pərvin Kərimzadə bildirib.

Deputat qeyd edib ki, hər zaman terrorizmi, işğalçılığı müdafiə edən ermənilər küçələrə çıxıb narazılıqlarını, məğlubiyyətləri ilə barışmadıqlarını bildirir, cavab verməsi üçün vaxtilə “demokrat qiyafəsində” peyda olan Nikol Paşinyanı axtarır. Bu gün təşvişə düşən ermənilər ölkələrinin kriminal şəxslərin, neofaşistlərin yuvasına çevriləndə susdu, Azərbaycana qarşı təcavüzkar və təxribatçı siyasət yürüdüləndə, sentyabrın 27-də Ermənistan silahlı qüvvələri atəşkəs rejimini kobud şəkildə pozaraq Azərbaycan Ordusunun cəbhə zonasında yerləşən mövqelərini atəşə tutanda, mülki insanları qətlə yetirəndə, qadağan olunmuş silahlardan istifadə edəndə səslərini çıxarmadılar.

Təkcə ermənilər deyil, onların havadarları olan bəzi Qərb dairələri də səssiz qaldı. Hətta hakimiyyətdə olduğu cəmi 2 il ərzində “korrupsiyaya qarşı mübarizə” adı altında siyasi rəqibləri ilə haqq-hesab çürütməyə başlayan, keçmiş prezidentlərdən birini həbs edən, digərinə qarşı cinayət işi qaldıran, aparıcı müxalifət partiyasının sədri, deputat Sarukyanı hələ də həbsdə saxlayan Paşinyanın davranışları Qərb dairələrini “narahat etmədi”.

Havadarlarının başına çəkdiyi tumardan ruhlanan Paşinyan hakimiyyəti Azərbaycan tərəfindən sarsıdıcı məğlubiyyətə uğradılmasına baxmayaraq, ölkə daxilində baş qaldıran narazılıq və xalq qəzəbini söndürmək üçün amansız repressiyalara başlayıb. Nikol Paşinyanın istefası tələbi ilə çıxış edənlər “milli xəyanətkarlar” kimi təqdim olunur, hərbi vəziyyət zamanı mitinq təşkil etmək və dövlət sirrini açıqlamaqda təqsirləndirilir, hətta tənqidə görə 1200 avrodan başlayan cərimələr tətbiq edilib.

Özünü “demokratik” adlandıran işğalçı dövlət Qarabağda və Ermənistanda baş verən hadisələr haqqında həqiqəti yazdığı üçün rusiyalı jurnalist Oleq Kaşinin akkreditasiyasını ləğv edib, ölkədən uzaqlaşdırıb. Bunu görən beynəlxalq jurnalist təşkilatları da susur. Erməni vandallığı, talançılığı xarici telekanallarının reportajlarında da öz əksini tapıb. Reportajdan açıq-aydın görünür ki, Azərbaycanın maddi mədəni sərvətlərinin dağıdılması, qarət olunması indi də davam edir. Məğlub olan ermənilər aparılması mümkün olan əşyaları yük maşınlarına yükləyir, apara bilmədiklərinə isə od vurub yandırır, məhv edirlər.

Deputat qeyd edib ki, “böyük Ermənistan" xülyasının tam iflasa uğraması bu günün reallığıdır. Böhran və fəlakət girdabında çabalayan Ermənistan həqiqəti, törətdiyi terror aktlarını, müharibə cinayətlərini dünya ictimaiyyətindən gizlədə bilməyəcək, həm tarix qarşısında, həm də beynəlxalq hüquq qarşısında cavab verəcək.