Ermənistanda müdafiə haqqında qanuna dəyişikliklərin edilməsi müzakirə olunur və bunu zəruri edən səbəb ondan ibarətdir ki, faktiki olaraq ölkədə müdafiəni təşkil edəcək insani resurslar, ordu, orduda nizam-intizam yoxdur. Ermənistanın əl atdığı sonuncu təxribatlar zamanı bir daha aydın oldu ki, bu ölkənin ordusu döyüş qabiliyyətli deyil. Ona görə də yeni qanunda könüllülərin orduya cəlb olunması məsələsi aktuallaşdırılır və düşünürlər ki, bu şəkildə işğalçı Ermənistanın ordusunu gücləndirmək olar. Ancaq bu, mümkün deyil.

Bu fikirləri AZƏRTAC-açıqlamasında Milli Məclisin deputatı, "Yeni Azərbaycan" qəzetinin baş redaktoru Hikmət Babaoğlu deyib.

Əslində məsələnin başqa tərəflərinin də olduğunu qeyd edən H.Babaoğlu bildirib ki, diqqətlə təhlil etdikdə aydın olur ki, könüllülərin orduya cəlb olunmasında əsas məqsəd heç də ordunun gücləndirilməsi deyil. Bu vasitə ilə hər şeydən öncə Paşinyan orduda özünə sadiq qüvvələr yaratmaqla siyasi rəqibləri önündə üstünlük qazanmağa çalışır. Çünki onun siyasi rəqibləri bu və ya digər formada ordu ilə bağlı olmuş və sonradan prezidentlik kürsüsünü əldə etmiş şəxslərdir ki, Sarkisyan da, Köçəryan da bu şəkildə eyni keçmişə malik idilər. Beləliklə, orduda, onun hərbi elitasında onların müəyyən nüfuzu var. İkinci məsələ ondan ibarətdir ki, bu proses adı altında yəni, könüllülər adı altında Ermənistan öz işğalçı ordusuna muzdluları və terrorçuları cəlb etmək niyyəti güdür ki, bu da əslində, onsuz da terrorçu olan orduya yeni terrorçuların cəlb edilməsi siyasətidir.

Hikmət Babaoğlu diqqətə çatdırıb ki, əsas məsələlərdən biri də orduda yeni güc mərkəzi yaratmaqla Paşinyana qarşı mümkün iğtişaşlara cavab vermək üçün sadiq qüvvələr əldə etməkdir. Ona görə də hazırda bu dəyişikliyin həyata keçirilməsi ilə bağlı addımlar atılmaqdadır. Amma bu formada şübhəsiz ki, ordunu gücləndirmək olmaz. Çünki insani resursların qıtlığı, vətəndaşların, hərbi qulluq yaşına çatmış gənclərin ölkəni tərk etməsi, ümumiyyətlə, əhalinin ölkəni tərk etməsi Ermənistanda ordu quruculuğu işini də iflic vəziyyətinə salıb. Bu problemi həll etmək zərurətindən irəli gələn axtarışlar zamanı bir müddət əvvəl müxtəlif ideyalar ortaya atıldı: “Paşinyan əvvəlcə xalq, ordu qurmaq tezisini irəli sürdü. Əlbəttə ki, olmayan xalqdan olmayan bir ordu da düzəltmək mümkün deyil. Xalq, ordu ənənəsi, ümumiyyətlə, Ermənistanın tarixində olmayan bir hadisədir. Ona görə də öz milli xarakterlərinə uyğun olaraq könüllülər adı altında muzdluların və terrorçuların Ermənistan ordusuna cəlb etməsini ən doğru və ən optimal yol kimi müəyyənləşdirdilər. Amma şübhəsiz ki, könüllülərin orduya cəlb edilməsi məsələsi və onların saxlanılması Ermənistan büdcəsinin öhdəsindən gələcəyi bir iş deyil”.

Hikmət Babaoğlu diqqətə çatdırıb ki, Ermənistanda xalq ordusunun yaradılmasının çox ciddi maliyyə tərəfləri var. Bu, sadəcə, ətrafında bütün həlqələrin daraldığını hiss edən Ermənistanın uğursuz çırpınışlarıdır. Şübhəsiz ki, bunlar heç bir halda Ermənistan ordusunu güclü etməyəcək və Azərbaycan öz güclü ordusu ilə ən qısa zamanda ərazi bütövlüyünü bərpa edəcək.