Prezident cənab İlham Əliyevin xarici siyasətinin əsas prioritetlərindən birini Mərkəzi Asiya dövlətləri ilə sıx siyasi, iqtisadi əlaqələrin qurulması təşkil edir.

2003-cü ildən ölkə başçımızın 16 dəfə Mərkəzi Asiya ölkələrinə səfər etməsi, bu dövlətlərin prezidentlərinin də 26 dəfə Azərbaycana səfər etmələri ölkələrimiz arasında dostluq əlaqələrinin yüksək səviyyəsindən xəbər verir. Ötən il Özbəkistanda Mərkəzi Asiya Dövlət Başçılarının Məşvərət Görüşündə Azərbaycanın bu təşkilata tamhüquqlu iştirakçı kimi qəbul edilməsi Azərbaycanın beynəlxalq aləmdə artan nüfuzundan xəbər verir.

Prezident cənab İlham Əliyevin Mərkəzi Asiya dövləti olan Qırğızıstana budəfəki səfəri çərçivəsində imzalanan sənədlər dövlətlərimiz arasında iqtisadi-siyasi əlaqələri ən yüksək səviyyəyə qaldırdı. Azərbaycan Respublikasının Prezidenti cənab İlham Əliyev və Qırğızıstan Prezidenti cənab Sadır Japarov tərəfindən imzalanmış strateji tərəfdaşlıq Bəyanatının qəbul edilməsi xüsusi əhəmiyyət kəsb edir. Bu Bəyanat iki dövlət arasında dostluq və qardaşlıq əlaqələrinin ən yüksək səviyyədə olmasından xəbər verir və gələcəkdə də bu siyasi kursun daha da dərinləşəcəyinin ifadəsidir. Azərbaycanla Qırğızıstan arasında bu qardaşlıq münasibətləri ikitərəfli əməkdaşlıqla yanaşı, Türk dünyasının inteqrasiyasına xidmət edir.

Ölkə başçımızın Qırğızıstana səfəri çərçivəsində Azərbaycanla Qırğızıstan arasında iqtisadiyyat, investisiya, nəqliyyat, logistika, kənd təsərrüfatı, humanitar, energetika sahələrində sıx əməkdaşlıq əlaqələrinin qurulmasına dair olduqca mühüm sənədlər imzalandı. Azərbaycan- Qırğızıstan İnvestisiya Fondunun kapitalının 100 milyon ABŞ dollarından 200 milyon dollara çatdırılması iqtisadi əlaqələrimizin gələcəkdə yüksək templə inkişafına xidmət edəcək.

İssık-Kul gölünün sahilində Azərbaycan dövlətinin inşa etdiyi 5 ulduzlu "Baku Resort & SPA" oteli, Qırğızıstan dövlətinin Ağdamda tikdirdiyi "Manas" adına məktəb dostluğumuzun, qardaşlığımızın simvolu kimi hesab olunur. Eləcə də, Çingiz Aytmatovun Bakıda abidəsinin açılışı, Bişkekdə Azərbaycan - Qırğızıstan Dostluq Parkının yaradılması, həmçinin qarşılıqlı mədəniyyət günlərinin keçirilməsi eyni soy-kökə, ortaq tarixə, mədəniyyətə mənsub olan xalqlarımızın bir-birinə bağlantısını daha da artıracaq.

Prezident cənab İlham Əliyevin Qırğızıstanın birinci dərəcəli "Manas" ordeni, Qırğızıstan Prezidenti Sadır Japarovun Azərbaycanın ali mükafatı olan "Heydər Əliyev" orderi ilə təltif olunması dövlətlərimiz, xalqlarımızla yanaşı, hər iki dövlət liderlərinin dostluğundan, yüksək etimadından xəbər verir. Azərbaycan Qırğızıstanla yanaşı, digər Mərkəzi Asiya dövlətlərinin də Avropa ilə əlaqələrinin yaranmasında körpü rolunu oynayır. Xüsusilə Azərbaycanın reallaşdırdığı Trans-Xəzər nəqliyyat-logistika marşrutu və Orta Dəhlizin Mərkəzi Asiya dövlətlərinin Avropa dövlətləri ilə iqtisadi-siyasi əlaqələrində rolu olduqca əhəmiyyətlidir. Prezident cənab İlham Əliyevin Qırğızıstana bu səfəri Türk dünyası dövlətləri və xalqları arasında dostluq münasibətlərinin əbədi olacağına böyük töhfə verəcək.

Kamilə Əliyeva

Bakı Dövlət Universitetinin kafedra müdiri, professor