Bəzən təqvim elə təsadüflər yaradır ki, onlar adi bir üst-üstə düşmə olmaqdan çıxır, rəmzə çevrilir. Xalq şairi Nəriman Həsənzadənin vəfat etdiyi günün – 1 Avqust, Azərbaycan Əlifbası və Azərbaycan Dili Gününə təsadüf etməsi də məhz belə bir rəmzi məna daşıyır. Bu xəbər təkcə Azərbaycan ədəbiyyatı üçün deyil, həm də ana dilimizin taleyinə ömrünü bağlayan bir nəslin vidasıdır.

Nəriman Həsənzadə Azərbaycan poeziyasında sözün məsuliyyətini daşıyan sənətkarlardan idi. Onun yaradıcılığı təkcə poetik duyğuların deyil, milli düşüncənin, tarixi yaddaşın və ana dilinə sevginin ifadəsidir. O, şeirlərində Azərbaycan dilinin bütün incəliklərini, zənginliyini və ahəngini qoruyub yaşatmağı bacarmış, sözün gücünü xalqın mənəvi sərvətinə çevirməyi bacarmışdı.

Azərbaycan dili əsrlər boyu xalqımızın milli kimliyini yaşadan ən böyük dəyər olub. Nəriman Həsənzadə də bu dəyərin ən sədaqətli qoruyucularından biri idi. Onun misralarında dil sadəcə ünsiyyət vasitəsi deyil, Vətən sevgisinin, insan taleyinin və milli yaddaşın daşıyıcısı kimi təqdim olunurdu. Bu baxımdan, onun ömür yolunun son nöqtəsinin məhz Azərbaycan Dili Gününə təsadüf etməsi sanki taleyin yazdığı mənalı bir epiloqdur.

Şairlər fiziki olaraq dünyadan köçürlər, amma onların səsi yaşayır. Nəriman Həsənzadənin səsi isə kitablarında, şeirlərində, poemalarında və yetişdirdiyi oxucu nəslinin yaddaşında bundan sonra da yaşayacaq. Onun ömrü Azərbaycan sözünün xidmətində keçdi, son mənzilə yola salındığı gün isə Azərbaycan dilinin bayramı idi. Bu təsadüf, əslində, onun bütün həyatının qısa və dəqiq xülasəsidir.

Bu gün biz yalnız görkəmli bir şairlə deyil, sözün ləyaqətini qoruyan bir ziyalı ilə vidalaşırıq. Azərbaycan dili isə onun yazdıqları ilə bundan sonra da yaşayacaq, yeni nəsillərə ötürüləcək. Çünki həqiqi şairlər ömürlərini başa vururlar, amma sözləri zamanın yaddaşında əbədiyyət qazanır.

Nəriman Həsənzadənin vəfatı Azərbaycan ədəbiyyatına ağır itkidir. Lakin onun irsi göstərir ki, dilə və sözə xidmət edən sənətkarlar heç vaxt tam ayrılmırlar – onlar öz xalqının danışığında, oxusunda və düşüncəsində yaşamağa davam edirlər.

Allah rəhmət eləsin!

Tədqiqatçı Nuralı İsmayılov