Son bir ildə ABŞ Mərkəzi Asiya və Cənubi Qafqazın potensialından istifadə etmək üçün ciddi addımlar atır. Çin ilə rəqabətə davam gətirmək üçün bölgələrin əhəmiyyəti ABŞ üçün daha da artır.

Bu sözləri Tacikistandan olan beynəlxalq münasibətlər üzrə ekspert Muhammad Şamsuddin deyib.

O qeyd edib ki, Çinin nadir mineralları nəzarətə almaq üçün atdığı addımların şahidi olmuşuq. Bölgənin resurslarına çıxış Vaşinqtona Pekin ilə rəqabət aparmaq imkanı verəcək. İrana qarşı müharibə Çinin qlobal bazarlardakı imkanlarını məhdudlaşdırır. Əfqanıstan-Pakistan sərhədində və Cənubi Çin dənizi bölgəsində qeyri-sabitlik Pekin üçün arzuolunan deyil. Bu şəraitdə şimali Avrasiyanın nəqliyyat potensialından istifadə Çin üçün səmərəli olar. ABŞ isə qitənin bu hissəsində nəzarətini və mövcudluğunu gücləndirir. Buna görə də, fond yaratmaq təşəbbüsünün Vaşinqtonun bu bölgələrdəki mövcudluğunu genişləndirmək məqsədi daşıdığını demək olar. Bunun Cənubi Qafqaz və Mərkəzi Asiyaya necə təsir edəcəyi sualına gəldikdə isə, demək lazımdır ki, bu bizim regionlar üçün çox yaxşı bir fürsətdir”.

Ekspert deyib ki, əgər TRIPP layihəsi reallığa çevrilərsə, bu, Mərkəzi Asiya ölkələrinə beynəlxalq logistika proseslərinə daha dərindən inteqrasiya olmağa imkan verəcək. Cənubi Qafqaz dövlətlərinə isə tranzit potensialından istifadə etmək və beynəlxalq tranzit mərkəzlərinə çevrilməyə şərait yaradacaq. Başqa sözlə, region dövlətləri qlobal aktorlar arasındakı rəqabətdən öz xeyrinə istifadə edə bilər. Lakin bu dövlətlərin hər biri balanslı münasibətləri saxlamaq üçün daim çevikliyi qorumalıdırlar”.

Qeyd edək ki, ABŞ Dövlət Departamenti 201 milyon dollarlıq büdcəsi olan TRIPP+ (Trampın Sülh və İnkişaf Yolu) fondunu yaradıb. Fondun məqsədi Cənubi Qafqaz və Orta Asiyada həyata keçirilən beynəlxalq iqtisadi layihələri maliyyələşdirməkdir. (Azərtac)