Regionda və qlobal arenadakı münaqişələr və gərginlik Türkiyədən Silahlı Qüvvələrini daim modernləşdirməyi və müdafiə qabiliyyətini dövrümüzün çağırışlarına uyğunlaşdırmağı tələb edir.

Fact-info.az xəbər verir ki, bu barədə Türkiyənin milli müdafiə naziri Yaşar Gülər sentyabrın 5-də bildirib. Onun sözlərinə görə, milli təhlükəsizliklə bağlı risklərin artması şəraitində dövlətlər, o cümlədən hava hücumundan müdafiə və raketdən müdafiə sahəsində öz müdafiə potensialını artırmağa borcludurlar.

Eyni zamanda o, yerli texnologiyaları milli təhlükəsizliyin təmin edilməsində “müəyyənedici amil” adlandırıb və buna misal olaraq Türkiyənin “Polad günbəz” raketdən müdafiə proqramını göstərib.

“Türkiyə sərhədləri yaxınlığında baş verən münaqişələr sübut edir ki, havada hökmranlığı təmin etməyən bir ölkə döyüş meydanında uğuru qoruyub saxlaya bilməz”, - deyə nazir vurğulayıb və ordunu “çoxsaylı təhdidlərin qarşısını almaq üçün alət” adlandırıb.

Y.Gülər Türkiyə hərbçilərinin Liviyadan tutmuş Somaliyə qədər və Azərbaycandan tutmuş Kosovoya qədər geniş bir məkanda sülh və sabitliyə töhfə verdiyinə diqqət çəkib.