“Prezident İlham Əliyev “Qarabağ”ı təbrik edib. Buna görə qürur hissi keçirirəm. O, bizim oyunlarımızı izləyir. Qələbə münasibətilə Prezident İlham Əliyevi və ailəsini təbrik edirəm”. Fact-info.az xəbər verir ki, bu sözləri “Qarabağ”ın baş məşqçisi Qurban Qurbanov UEFA Çempionlar Liqasının pley-off mərhələsində evdə Macarıstanın “Ferensvaroş” klubuna iki oyunun nəticəsinə əsasən 5:4 hesabı ilə qalib gələrək növbəti mərhələyə yüksəlmələri barədə danışarkən deyib.

O, matçın gərgin keçdiyini bildirib: “Futbolçularımla qürur duyuram. Çox xoşbəxtik. Tarixi nəticəni azarkeşlərimiz haqq edirdi”.

Q. Qurbanov son üç gündə komandasının gərgin olduğunu deyib: “Futbolçularımın yanında idim. Mənim özümdə də gərginlik hiss olunurdu. Oyunçularıma diqqətli olmaq barədə tapşırıq vermişdim. Biz Liqa mərhələsində olmağı tam olaraq haqq edirik”.

Baş məşqçi Liqa mərhələsinin matçlarını hansı stadionda keçirəcəkləri barədə də danışıb: “Hələ bu barədə qərar verməmişik. Oyunları Tofiq Bəhramov adına Respublika stadionunda da keçirə bilərik. Amma məsləhət olarsa, Bakı Olimpiya Stadionundan da istifadə edə bilərik”.