Bu fikirləri AŞPA yaz sessiyasında Azərbaycan nümayəndə heyətinin üzvü Rafael Hüseynov nümayəndə heyətimizin qış sessiyasında hazırladığı bəyannamə haqqında məlumat verərək deyib. Bildirib ki, İran Avropa ölkəsi deyil və onun birbaşa Avropa Şurasına aidiyyəti yoxdur. Amma İran getdikcə daha artıq dərəcədə təhlükə kəsb etməkdədir və bu təhlükələr həm birbaşa bir sıra Avropa ölkələrinə, həm də dünyaya yönəlibdir.

O, belə arzuolunmaz hadisələr və addımlardan sonra Avropa Şurasının belə hərəkətləri qınayan bəyanatlarının olmasını təqdirəlayiq hesab edərək bildirib ki, deputatlar belə hadisələrə sadəcə passiv müşahidəçi kimi qalmamalıdırlar. Belə fəlakətlərin qarşısını almaq üçün qabaqlayıcı addımların olmasının vacibliyini qeyd edib. Məhz buna görə də region ölkələri, Avropa və dünya üçün getdikcə daha artıq təhlükə mənbəyinə çevrilən belə təhlükələrlə bağlı Avropa Şurasının daha ciddi və təxirəsalınmaz tədbirlər görməsi, xüsusi qətnamənin qəbul edilməsi ilə nəticələnəcək ayrıca müzakirələr təşkil etməsinə ciddi ehtiyac olduğunu deyib.

Azərbaycanlı deputat son günlərin ən əlamətdar hadisəsi – Laçın-Xankəndi yolunun girişində Azərbaycanın nəzarət buraxılış məntəqəsi qurması məsələsindən söz açaraq, əvvəlcə bu qərarın verilməsini şərtləndirən mühüm amilləri açıqlayıb. R. Hüseynov bildirib ki, 2022-ci ilin avqustundan etibarən Ermənistandan Laçın yolu vasitəsilə Azərbaycan ərazisinə 2700-dən artıq piyada əleyhinə minalar gətirilib və onların hamısı 2021-ci ildə Ermənistanda istehsal edilib. Bu addımlar Azərbaycan, Ermənistan və Rusiya arasında 2020-ci ilin noyabrında bağlanmış üçtərəfli müqavilədən xeyli sonra baş verib.

Ötən il dekabrın 12-dən etibarən Azərbaycan vətəndaş cəmiyyəti fəallarının həmin yolda keçirdiyi ardıcıl aksiyalar Ermənistana oradan minaları keçirərək, Azərbaycan ərazisində yerləşdirmək imkanını məhdudlaşdırdığından gizli yollardan istifadə edilib. Onların bu cəhdləri Azərbaycan Müdafiə Nazirliyinin apardığı video çəkilişlərlə qeydə alınmışdır. Bütün bunları nəzərə alaraq Azərbaycan bütün mümkün təhlükələrin qarşısını almaq üçün Laçın-Xankəndi yolunun başlanğıcında nəzarət-buraxılış keçid məntəqəsinin yaradılmasını qət etmişdir. Ərazisində belə bir qərar qəbul etmək Azərbaycanın suveren hüququdur.

Rafael Hüseynov Ermənistan Xarici İşlər Nazirliyinin aprelin 23-də həmin nəzarət-buraxılış keçid məntəqəsinin yaradılması ilə bağlı verdiyi bəyanatı və Ermənistanın AŞPA-dakı nümayəndə heyətinin üzvünün çıxışına toxunaraq bildirib: “Ermənistan Xarici İşlər Nazirliyinin, eləcə də Ermənistanın buradakı nümayəndə heyətinin çıxışını mahiyyəti etibarilə rədd edir, bunu Azərbaycanın daxili işlərinə qarışmaq kimi qiymətləndiririk. Belə bir nəzarət-buraxılış keçid məntəqəsini yaratmaq Azərbaycanın haqqıdır, 5 kilometrlik bu sahə Azərbaycan ərazisidir və heç bir təxribatçı çıxış və bəyanatlar Azərbaycana öz ərazisində vətəndaşların, nəqliyyat vasitələrinin və yüklərin təhlükəsiz hərəkəti üçün müəyyənləşdirdiyi qaydaları tətbiq etməsindən çəkindirə bilməz”.