Fransız dilində nəşr olunan “IRS-Héritage” jurnalının növbəti nömrəsi işıq üzü görüb.

 Fact-info.az xəbər verir ki, bu nömrə Azərbaycan mədəniyyəti, tarixi və müasir hadisələri ilə maraqlanan oxucular üçün dəyərli məqalələr təqdim edir.

Jurnalda əsas yer Bakıda keçirilmiş COP29-a ayrılıb. Məqalələrdə Azərbaycanın yaşıl enerjiyə keçid və beynəlxalq iqlim əməkdaşlığı sahəsində atdığı mühüm addımlardan bəhs olunur.

Maraqlı mövzulardan biri Heydər Əliyev Mərkəzi haqqında məqalədir. Dünyaşöhrətli memar Zaha Hadidin şah əsəri hesab edilən bu bina, öz unikallığı ilə oxucuların diqqətini çəkəcək. Bundan əlavə, Brüsseldə təşkil olunmuş "Flowers of Baku" sərgisi çərçivəsində Bakının Art Nouveau memarlığı haqqında yazı da yer alıb.

Tarix həvəskarları Gəncəsər monastırı haqqında məqalədə onun tarixi və erməniləşdirmə prosesləri ilə bağlı maraqlı faktlarla tanış ola bilərlər.

Jurnalın kulinariya bölməsində isə Azərbaycan şərabı haqqında yazı yer alıb. Oxucular qədim şərabçılıq ənənələri və müasir dövrdə bu sahədə baş verən yeniliklər barədə məlumat əldə edəcəklər.

Yeni buraxılış fransızdilli oxuculara Azərbaycan mədəniyyətini və tarixini daha yaxından tanımaq imkanı yaradır.