Tədbirdə beynəlxalq ekspertlər, universitetin professor, müəllim heyəti və müxtəlif ölkələrdən olan tələbələr Azərbaycanın və Gürcüstanın işğal olunmuş ərazilərindəki tarixi abidələr barədə müzakirələrdə iştirak etdilər.
Gürcüstan-Azərbaycan Milli Konqresinin sədri Əli Babayevin təşəbbüsü ilə təşkil edilən bu tədbirin keçirilməsində məqsəd; Azərbaycan və gürcü alimlərlə birgə Azərbaycanın işğal altındakı tarixi abidələrinin mövcud vəziyyəti və eləcədə ermənilərin Cənubi Qafqazda törətdikləri vandalizm aktları və digər cinayətlər barədə gürcü xalqını və dünya ictimaiyyətini ətraflı məlumatlandırmaq idi.
Qafqaz Beynəlxalq Universitetinin professoru, tarixçi alim Ketevan Şaşiaşvili çıxışında Ermənistan-Azərbaycan, Dağlıq Qarabağ münaqişəsinin baş vermə səbəbləri barədə məlumat verərək bildirdi ki: “SSRİ dağıldıqdan sonra imperialist qüvvələr Cənubi Qafqazı rusiyanın nəzarətində saxlamaq üçün Gürcüstanın dövlət müstəqilliyinin bərpasına yol verməmək üçün müxtəlif planlar hazırladılar. Azərbaycanın Dağlıq Qarabağ bölgəsinin işğalı da bu planın tərkib hissəsi idi. Dağlıq Qarabağ və ona bitişik digər rayonlar SSRİ dövründə və ondan əvvəlki dövrlərdə də Azərbaycana məxsus olub. Gürcüstanın da ərazilərinin işğalı eyni ssenari əsasında həyata keçirilib. Bütün bunların bir məqsədi olub, iki dost və qardaş ölkə olan Azərbaycanın və Gürcüstanın müstəqil dövlət kimi dünya birliyində layiqli yer tutmalarına mane olmaq, inkişafdan saxlamaq. Müəyyən mənada buna nail olunsa da hər iki dövlət bu gün müstəqil siyasət yürüdür, möhkəmlənir və inkişaf edir”. Dünya birliyini erməni vandalizminə qarşı mübarizəyə səsləyən professor deyib ki, Gürcüstan hökuməti bununla bağlı xüsusi layihə hazırlayıb.
K.Şaşiaşvili jurnalistlərə müsahibəsində deyib: “Bu gün Azərbaycanın və Gürcüstanın işğal olunmuş ərazilərində minlərlə tarixi abidə var. Ermənilər bu abidələri dağıdır, talan edirlər. İslam mədəniyyətinə aid olan abidələr dağıdılır, xristian mədəniyyətinə aid olan abidələrin adları dəyişdirilir. Bu abidələrin bəziləri UNESCO-nun qeyri-maddi mədəni irs siyahısına daxil edilib. Buna baxmayaraq, ermənilər Dağlıq Qarabağda və işğal altında olan digər ərazilərdəki məbədlərin, alban tarixinə aid kilsə və digər tikili abidələrin adlarını silib erməni adı ilə qeydiyyata salıblar. Biz bu cür hallara qarşı mübarizəmizi gücləndirməliyik”.
Azərbaycan Respublikası Nazirlər Kabineti yanında itki və tələfatların qiymətləndirilməsi üzrə işçi qrupun üzvü Faiq İsmayılov çıxışında işğal olunmuş ərazilərimizdəki vəziyyətlə bağlı məlumat verdi. Bildirdi ki, ermənilər tərəfindən işğal olunmuş Azərbaycan ərazilərində 6 minə yaxın daşınmaz tarixi abidə, 34 minə yaxın bədii irs nümunəsi qalıb. Ermənilər bu abidələrin əksəriyyətini dağıdıb, talan ediblər. Ermənistana daşınan səyyar abidələrin çoxu xaricə satılıb. İşğal altında olan kitabxanalarda saxlanılan 4,6 milyon   kitabın və digər yazılı məlumatların   saxlanıldığı məlum deyil.
F.İsmayılovun çıxışı zamanı Azərbaycanın İşğal Olunmuş Ərazilərindəki Tarix və Mədəniyyət Abidələrini Müdafiə Təşkilatı  ictimai birliyi tərəfindən  hazırlanmış videoçarx nümayiş etdirildi. Videomateriallarda ermənilərin Azərbaycan torpaqlarında törətdikləri vandalizm aktları konkret faktlarla əyani şəkildə iştirakçılarının diqqətinə çatdırıldı.
F.İsmayılov jurnalistlərə müsahibəsində dedi: “Azərbaycanın və Gürcüstanın işğal altındakı ərazilərində erməni vandalizminin qarşısını almaq üçün beynəlxalq təşkilatlar abidələrin mühafizəsinə nəzarət etməlidirlər. Çünki Ermənistan hərbi münaqişələr zamanı mədəni sərvətlərin qorunması haqqında Haaqa Konvensiyasının və Mədəni sərvətlərin qeyri-qanuni dövriyyəsi haqqında” Paris Konvensiyasının müddəalarını kobud şəkildə pozublar. Məhz bu səbəbdən də vandalizm hallarına qarşı birgə mübarizə aparmaq lazımdır.
Daha sonra Azərbaycanın “Mərhəmət” Kimsəsizlərə Yardım İctimai Birliyinin sədri İradə Nəsirova, Gürcüstanda çıxan “Kommentarii” jurnalının baş redaktoru Vladimir Svidiani, Qafqaz Beynəlxalq Universitetinin müəllimi İnqa Baliaşvili və başqaları çıxış edərək mövzunun aktuallığını qeyd edib, dünya ictimaiyyətinin bu məsələyə diqqətinin artırılmasının vacibliyini vurğuladılar.
Yığıncağın sonunda qərara alındı ki, Mədəni dəyərlərə qarşı yönələn zorakı hərəkətlərə, vandallıqlara və digər pozucu hallara qarşı birgə mübarizə aparmaq və eləcədə Cənubi Qafqazda Mədəni dəyərlərin mühafizəsinin təşkili üçün işçi qrupu yaradılsın. İşçi qrupun birinci iclası sentyabr ayında Bakıda keçirilsin.