Kitab “Təfəkkür Dünyamızın Ulduzları” layihəsi çərçivəsində ərsəyə gəlib. Sözügedən layihəni Türkiyə Cümhuriyyəti Mədəniyyət və Turizm Nazirliyinin Xaricdə Yaşayan Türklər və Əqraba İcmalar İdarəsi ilə Gəncliyə Yardım Fondu (GYF) birgə həyata keçirir.

İdeya müəllifi GYF başqanı Əhmət Tecim olan bu nəşr Əli Can (Türkiyə), Abbas Qurbanov və Qoşqar Abbasovun (Azərbaycan) ortaq əməyi ilə hazırlanıb.

Ə.Tecim kitabdakı “Təqdimat” sərlövhəli yazısında qeyd edir ki, tarixin bəlli dönəmlərində Çin səddindən Adriatik dənizinə qədər böyük bir ərazidə Türk-İslam mədəniyyəti təsirli, təyinedici amil olub: “Əcdadımızın böyük Avrasiya coğrafiyasında meydana gətirdiyi mədəniyyət bütün dünyanı heyran qoyub... Bir millətin gələcəkdə də var olması üçün onun fərdlərinin, xüsusən də gəncliyin öz milli-mənəvi dəyərlərinə, mədəniyyətinə cahib çıxması zəruridir...”

Bu vacib amil nəzərə alınmaqla hazırlanaraq oxuculara təqdim olunan kitab da məhz belə bir amala xidmət edir.

Nəşrin “Ön söz”ünü Ə.Can yazıb, “Giriş” bölümünün müllifləri isə A.Qurbanov və Q.Abbasovdur.

Kitabda Türk-İslam dünyasının görkəmli şəxsiyyətlərindən İbn Xəldun, Məhməd Akif Ərsoy, Məhəmməd İqbal, Hüseyn Cavid, Əhməd Cavad, Hilmi Ziya Ülkən, Nəcib Fazil Qısakürək, Məhəmmədhüseyn Şəhriyar, Almas İldırım, Nurəddin Topçu, Cəmil Meriç, Bəxtiyar Vahabzadə, Aliya İzzetbeqoviç, Çingiz Aytmatov, Səzai Kakakoç, Rasim Özdənörən və İsmət Özəlin fikir və söz irsinə diqqət yetirilib. Nəşrin səhifələrində bu böyük simaların yaradıcılığından nümunələr, onların ortaq keçmişimizdən xəbər verən, bugünümüzə və gələcəyimizə işıq salan aydın düşüncə dünyası barədə mülahizələr yer alıb.

“İpəkyolu” nəşriyyatında çap edilmiş kitabın redaktoru Əziz Sultanov, tərtibatçı-dizayneri Nicat Qəribovdur.