Özbəkistandakı Heydər Əliyev adına Azərbaycan Mədəniyyət Mərkəzinin (AMM) layihəsi çərçivəsində tanınmış rus tarixçisi, tarix elmləri namizədi Oleq Kuznetsovun “Qarabağ münaqişəsinin “mifləri” haqqında həqiqətlər” kitabı Daşkənddə özbək dilində çap olunub.

Fact-info.az AZƏRTAC-a istinadən xəbər verir ki, kitabı özbək dilinə alim Babaxan Şərif tərcümə edib.

Nəşrdə münaqişənin tarixi, onun yaranma səbəbləri, azərbaycanlılara qarşı həyata keçirilən təcavüzkar siyasət, rus alimi Stanislav Tarasov tərəfindən tarixin saxtalaşdırılması və münaqişənin əsl səbəbinin təhrif edilməsi ilə bağlı şərhlər öz əksini tapıb.

Qeyd edək ki, Stanislav Tarasovun Rusiyanın “Minuvşeye” nəşriyyatında çap edilən “Qarabağ münaqişəsinin mifləri” kitabına daxil olan məqalələrin obyektivliyi əks etdirməməsi, kitabdakı esselərdə ötən əsrin əvvəllərində Cənubi Qafqazda sovet hakimiyyətinin qurulduğu illərdən indiki dövrədək məlum olan bir çox tarixi hadisələrin və faktların saxtalaşdırılması səbəbindən Oleq Kuznetsov bu mövzuya yenidən müraciət etməli olub.

Oleq Kuznetsov konkret tarixi faktlar və arxiv sənədləri əsasında S.Tarasovun kitabındakı uydurmaları ortaya qoyur, tarixin təhrif olunduğunu əyani şəkildə sübut edir.

Kitab əslində Ermənistan-Azərbaycan Dağlıq Qarabağ münaqişəsi haqqında deyil, rus tarixşünaslığının bir sıra təmsilçilərinin mənəvi düşkünlüyündən, siyasi konyuktura, öz şəxsi maddi maraqları naminə rus tarixşünaslığını zərbə altına qoyanlardan bəhs edən hüquqi tarixi əsərdir.

Xatırladaq ki, Oleq Kuznetsov Ermənistan-Azərbaycan Dağlıq Qarabağ münaqişəsi, ermənilərin saxta tarixi haqqında bir sıra kitabların, monoqrafiyaların, elmi araşdırmaların müəllifidir.

Azərbaycan Mədəniyyət Mərkəzi kitabın Özbəkistanın kitabxanalarına, elmi-tədqiqat müəssisələrinə hədiyyə edilməsini nəzərdə tutur.