Tədbiri professor Buludxan Xəlilov açaraq layihə barədə fikirlərini bölüşüb. Bildirib ki, müasir dünyanın dəyişən tələblərinə uyğun oxu vərdişləri, münasibətlər sistemi yaranır və insanların bir-biri ilə ünsiyyət, kommunikasiya qaydaları müəyyənləşir. Zamanın tələblərinə uyğunlaşmağın özünü zaman tələb edir.

Professor qeyd edib ki, bu baxımdan tədbirin mahiyyəti bir az fərqlidir. “Çünki tədbirdə sözün, səsin, fikrin, düşüncənin vəhdətini görəcəyik. Layihənin mahiyyətində insan olmaq məsələsi, ətrafdakıları dərk etmək, dərk etdiklərini anlamaq və onu qarşı tərəfə ötürmək dayanır. Sabir Fondunun rəhbəri Sevda Tahirli layihədə dünya dörd görkəmli şəxsiyyətindən epizodlar gətirərək dünyaya bir qapı açıb. Nümayiş olunacaq videoçarxda Antuan de Sent Ekzüperinin “Dua”, Qabriel Qarsia Markesin “Vida məktubu”, Mahatma Qandinin “Dua”, Avraam Linkolnun oğlunun müəlliminə məktubundan epizod olacaq. Bu süjetdə ləyaqət, inam, etibar, insana və ətraf mühitə qiymət var”, - deyə Buludxan Xəlilov bildirib.

Mirzə Ələkbər Sabir Fondunun rəhbəri Sevda Tahirli rəhbərlik etdiyi qurumun həyata keçirdiyi layihələr barədə məlumat verib. S.Tahirli təqdimatı keçirilən layihənin dünya ədəbiyyatının motivasiyaedici nümunələrini daha yaxından tanıtmaq və sevdirməklə yanaşı, yaş həddi olmadan hər kəsin, xüsusilə, formalaşmaqda olan gənclərin mənəvi dünyasının daha da zənginləşməsi üçün nəzərdə tutulduğunu söyləyib.

Qeyd edib ki, layihədə məqsəd yeni texnoloji imkanların və effektlərin qazandırdığı üstünlüklərdən yararlanaraq təqdim olunan nümunələrin təsir gücünü bir qədər də artırmaqla cəmiyyətin hər bir üzvünün həyata baxışlarının daha aydın, keyfiyyətli, cəmiyyətin və dövlətimizin maraqlarına uyğun olaraq daha pozitiv notlarda köklənərək ən doğru istiqamətə yönəlməsinə kömək etməkdir. Sonra “ART-Motiv” adlı videoçarx nümayiş olunub.