Layihə çərçivəsində rus dilində “Qarabağ ədəbiyyatı” elektron toplusu hazırlanıb. 

Topluda orta əsrlərdən müasir dövrədək Azərbaycanın bu tarixi bölgəsində yaşayıb-yaratmış, əslən Qarabağdan olan 100-dək şair, yazıçı və mütəfəkkirin həyatı, yaradıcılığı haqqında məlumatlar, əsərlərindən nümunələr rusdilli oxuculara təqdim edilir. 

Qeyd edək ki, may-oktyabr aylarında icra olunan layihə üzrə müxtəlif elektron toplu və xronoqraflar (“Bizim təqvim”, “Mədəniyyət gündəliyi”, “Qarabağ tarixinin salnaməsi” və s.) hazırlanaraq ww.azerbaycanli.org saytında istifadəyə verilib. 

www.azerbaycanli.org saytı Azərbaycanın tarixi, bu günü, mədəni irsi, mənəvi dəyərləri, Qarabağ problemi ilə bağlı elektron-məlumat bazası və analitik-xəbər portalı kimi 2009-cu ildən fəaliyyət göstərir. 

2011-ci ildə saytda ilk dəfə Azərbaycan dilində “Qarabağ ədəbiyyatı” toplusu tərtib edilərək internet istifadəçilərinə təqdim edilib. Yeni layihə əsasında həmin toplu daha da zənginləşdirilərək rus dilinə tərcümə olunub. 

Mədəni irs hər bir xalqın yaşadığı torpaqda tarixini, qədimliyini sübut edən başlıca meyardır. Tarixi yurd yerimiz olan Qarabağda yaşayıb-yaratmış mütəfəkkir və ədiblərin zəngin irsi də bu baxımdan xüsusilə dəyərlidir. Bu irsin öyrənilməsi, tədqiq və təbliğ olunması, müxtəlif xarici dillərdə dünyaya çatdırılması böyük əhəmiyyət kəsb edir. 

Prezident İlham Əliyev bununla bağlı deyib: “Ermənilərin Dağlıq Qarabağa iddiaları tamamilə əsassızdır. Biz bunu bilirik, amma gərək bu həqiqətləri dünya birliyinə çatdıraq. Bunun üçün təbliğat işləri daha güclü olmalıdır. Bu işləri internet vasitəsilə daha fəal şəkildə görmək lazımdır”. 

Rus dilində hazırlanan “Qarabağ ədəbiyyatı” toplusu da bu məqsədə xidmət edir. toplu eyni zamanda Qarabağın tarixi, mədəni irsi ilə bağlı yeni elektron resursların, nəşrlərin hazırlanmasına zəmin olacaq. (qhtxeber.az)

Elektron toplu ilə bu linkdə tanış olmaq olar: http://azerbaycanli.org/?page=19&lang=rus