Bakıda Türkiyə-Azərbaycan Dostluq Dərnəkləri Federasiyası İqdır Azərbaycan Evinin başqanı, tanınmış yazar Sərdar Ünsalın “Ürəyim İrəvanda qaldı” romanının təqdimat mərasimi keçirilib.

Təqdimatda çıxış edən müəllif Sərdar Ünsal bildirib ki, “Ürəyim İrəvanda qaldı” romanı 1920-ci ildə Türk yurdu olan və hazırda Ermənistanın paytaxtı İrəvan şəhərində yaşayan türklərin erməni zülmünə görə doğulduqları yerlərdən köç etdiklərindən bəhs edilir. Kitabda tarixdə yaşanmış gerçək hadisələr öz əksini tapıb.

S.Ünsalın sözlərinə görə, romanda onun ata nənəsinin İrəvandan erməni zülmünə görə qaçmaları və yaşadıqları ağır durumdan bəhs edilir.

S.Ünsalın nənəsi İrəvanda evini, sevdiklərini, atasını qoyaraq əri və qızı ilə İrana qaçmaq istəyib. Amma qaçarkən ermənilər Araz çayı yaxınlığında ərini güllələyərək öldürüblər. Beləliklə, onlar İrəvandan Araz çayına, oradan İrana, İrandan isə Türkiyəyə, Iğdıra gediblər.

 Bir sözlə, “Ürəyim İrəvanda qaldı” romanında ermənilərin gerçək iç üzü açılıb. Müəllif deyib ki, oxucu “Ürəyim İrəvanda qaldı” romanında Vətənə, İrəvana həsrət ölənlərin hekayəsini, ermənilərin etdiyi zülmü, onların 1920-ci ildə İrəvanda törətdikləri vəhşəti, Araz çayını qan gölünə çevirmələrini, əri arvaddan, ana və atanı baladan ayırmalarını, bir Xocalı faciəsının bənzərini oxuyacaq.

 Daha sonra iştirakçılar kitabın  əhəmiyyətindən danışıblar.