Beynəlxalq alimlər qrupunun apardığı araşdırma göstərib ki, daha parlaq gecə işığı beş əsas ürək-damar xəstəliyinin inkişaf riskini artıra bilər.

Gecə işığı sirkad ritmlərini pozur, bu da ürək-damar sistemi üçün mənfi nəticələrə səbəb olan risk faktorudur. Bununla belə, fərdi işıqlandırma səviyyəsinin ürək-damar xəstəlikləri üçün risk səbəbi olub-olmaması tam aydın deyil.

Flinders Səhiyyə və Tibbi Tədqiqatlar İnstitutunun (Avstraliya) alimləri Böyük Britaniya və ABŞ-dan olan həmkarları ilə birlikdə 88 905 nəfərin iştirak etdiyi və hələ də resenziya verilməmiş araşdırmada göstəriblər ki, gecə işığının təsirindən uzaq olmaqla ürək-damar xəstəlikləri riskini azaltmaq olar.

Alimlər qeyd edirlər ki, gecə işığına məruz qalma qadınlara daha çox təsir edir, ürək çatışmazlığı və ürəyin işemik xəstəliyi ilə əlaqədar daha güclü assosiasiyalar müşahidə olunur. Daha gənc iştirakçılarda ürək çatışmazlığı və atrial fibrilasiya riskinin artdığı da aşkar edilmişdir.

Araşdırmada, qrup biləyə taxılan işıq sensorları ilə izlənilən təxminən 13 milyon saatlıq fərdi işığa məruz qalma məlumatlarını istifadə edib (hər biri bir həftə).

Nəticələr göstərdi ki, işıqlı bir otaqda yatan insanlarda ürəyin işemik xəstəliyi, miokard infarktı (ürək böhranı), ürək çatışmazlığı, atrial fibrilasiya (nizamsız ürək döyüntüsü) və insult riski qaranlıqda yatanlarla müqayisədə xeyli yüksəkdir.

Fiziki fəaliyyət, siqaret çəkmə, alkoqol, pəhriz, yuxunun davamlığı, sosial-iqtisadi status və poligen riski də daxil olmaqla müəyyən edilmiş ürək-damar risk faktorlarına düzəliş etdikdən sonra qarşılıqlı əlaqə davamlı olub.

Tədqiqatçılar izah ediblər ki, qeyri-təbii işıq sirkad ritm pozğunluğuna səbəb ola bilər ki, bu da “ürək-damar riskini artıran metabolik və damar anomaliyalarına səbəb ola bilər”.