İtaliyanın nüfuzlu “İl Giornale” qəzetinin xüsusi buraxılışı olan “Insideover” analitik portalında Azərbaycanla İtaliyanın iqtisadi əlaqələrinə dair məqalə dərc edilib. Məqalədə bildirilir ki, İtaliya türk xalqları arasında ən möhkəm əlaqələri Azərbaycanla qurub.

Hər iki ölkənin müttəfiqlik və strateji tərəfdaşlıq əlaqələrinin son iki ildə Trans-Adriatik təbii qaz kəməri (TAP) ilə yüksəliş tendensiyası nümayiş etdirdiyi qeyd olunub. Azərbaycanla İtaliyanın ticarət dövriyyəsi barədə məlumat verilən məqalədə bildirilir ki, cari ilin ilk üç rübündə İtaliya Azərbaycanın birinci və əsas ticarət tərəfdaşı olub. Hesabat dövründə iki ölkənin ticarət dövriyyəsi 5,9 milyard dollar təşkil edib. Bunun 5,6 milyard dolları Azərbaycandan İtaliyaya, 327,9 milyon dolları isə İtaliyadan Azərbaycana ixrac olunan məhsulların hesabınadır. Ticarət dövriyyəsi keçən ilin eyni ayları ilə müqayisədə təxminən iki dəfə artıb. Belə ki, ötən ilin yanvar-sentyabr aylarında 3,4 milyard dollarlıq ticarət dövriyyəsi qeydə alınıb.

Məqalədə ilin sonunadək Azərbaycanla İtaliyanın ticarət dövriyyəsində yeni rekord göstəricinin qeydə alınacağı bildirilir. Qeyd olunur ki, Azərbaycan Cənubi Qafqazda İtaliya istehsalı olan məhsulların əsas alıcısıdır.

Yazıda TAP-ın istifadəyə verilməsi və İkinci Qarabağ müharibəsindən sonra iki ölkə arasında ticarət əlaqələrinin intensivləşdiyi, investisiya axınlarının artdığı qeyd olunub. Bildirilir ki, hazırda Azərbaycanda ümumilikdə 11,8 milyard dollarlıq layihələr həyata keçirən 100-dən çox İtaliya şirkəti fəaliyyət göstərir. İtaliya Qarabağdakı yenidənqurma prosesinin fəal iştirakçılarındandır. İtaliya şirkətləri Qarabağın dirçəldilməsi ilə məşğul olur, Cənubi Qafqazda - Zəngilan rayonunda ilk “ağıllı şəhər”lərə öz imzalarını atırlar.

Qeyd edilir ki, Azərbaycan indiyədək İtaliya iqtisadiyyatına 2 milyard dollar sərmayə yatırıb. İtaliya isə Azərbaycan iqtisadiyyatına 1 milyard dollar investisiya yönəldib.