Bunu AZƏRTAC-a müsahibəsində gürcü politoloq Tengiz Txilava deyib.

O qeyd edib ki, Azərbaycanın Vətən müharibəsindəki Qələbəsindən cəmi bir il keçib, amma bu müddət ərzində çox böyük və əsaslı işlər görülüb. Yəni, Azərbaycan bu bir ili boşuna yola salmayıb, vaxt itirmədən çox ciddi işlər həyata keçirib.

“Hamıya məlumdur ki, ermənilər işğal etdikləri ərazilərdə heç bir infrastruktur yaratmayıb, əksinə, olanları da dağıdaraq tam məhv ediblər. Görünür, onlar yaxşı başa düşürdülər ki, işğal etdikləri əraziləri gec-tez qaytaracaqlar”, - deyən politoloq əlavə edib ki, Prezident İlham Əliyev ilk gündən Qələbədən sonra dayanmaq olmaz demişdi. Bildirmişdi ki, bu ərazilərdə köklü dəyişikliklər edilməlidir və biz, çox mühüm dəyişikliklərin şahidiyik. Bu gün təkcə Füzuli Beynəlxalq Hava Limanının açılışını görmürük. Bu gün işğaldan azad edilmiş ərazilərdə çox böyük quruculuq, təmir-bərpa işləri görülür, yeni yollar salınır, iqtisadi, sosial və ictimai binalar tikilir, yeni infrastruktur yaradılır. Bu isə bir daha onu deməyə əsas verir ki, Azərbaycan öz torpaqlarını işğaldan azad etməklə kifayətlənməyib, regionun inkişafı üçün əlindən gələni edir”, – deyə Txilava vurğulayıb.

Politoloqun sözlərinə görə, Prezident İlham Əliyevin bu siyasəti, işğaldan azad edilmiş bölgələrin sosial-iqtisadi inkişafı təkcə Azərbaycan üçün deyil, region dövlətlərinin inkişafı üçün də zəmin və geniş imkanlar yaradacaq.