Azərbaycan Respublikasının İsveçrədəki səfirliyinin dəstəyi ilə “Azərbaycanlıların İsveçrədəki Mədəniyyət Mərkəzi” (AİMM) tərəfindən təşkil olunan tədbirdə yerli ictimaiyyət nümayəndələri, o cümlədən İsveçrədə yaşayan soydaşlarımız iştirak ediblər. Tədbirdə çıxış edən ölkəmizin İsveçrədəki səfiri Xanım İbrahimova Azərbaycan Xalq Cumhuriyyətinin yaranması tarixi və bu hadisənin ölkəmizin sonrakı inkişafı üçün əhəmiyyəti barədə ətraflı danışıb. O, Cumhuriyyətin qurulmasına aparan keşməkeşli yola nəzər salaraq, xüsusilə 1918-ci ilin mart-aprelində azərbaycanlılara qarşı törədilmiş soyqırıma diqqət çəkib və bir neçə gün ərzində təkcə Bakıda erməni daşnakları tərəfindən minlərlə soydaşımızın amansızlıqla qətlə yetirildiyini bildirib.

1991-ci ildə müstəqilliyini bərpa edən Azərbaycanın iqtisadi tənəzzül və Ermənistanın hərbi təcavüzü nəticəsində böyük bir təhlükə ilə üz-üzə qaldığını söyləyən səfir bu təhlükənin ümummilli lider Heydər Əliyevin müdrik siyasəti sayəsində aradan qaldırıldığını diqqətə çatdırıb. O, mayın 10-da Ümummilli Liderin anadan olmasının 95-ci ildönümünün qeyd ediləcəyini deyərək, onun rəhbərliyi ilə 1994-cü ildə imzalanan Əsrin Müqaviləsinin Azərbaycanın sonrakı inkişafının təməlini qoyduğunu vurğulayıb. Səfir çıxışında, həmçinin Prezident İlham Əliyevin rəhbərliyi altında müasir Azərbaycanın nailiyyətləri, ölkəmizin təşəbbüskarı olduğu regional enerji və nəqliyyat layihələri barədə ətraflı məlumat verib, eləcə də Azərbaycanın mötəbər idman yarışları və beynəlxalq tədbirlərə, o cümlədən Mədəniyyətlərarası Dialoq üzrə Ümumdünya Forumuna ev sahibliyi etməsinə diqqət çəkib.

Sonra Bern Universitetinin Hüquq fakültəsinin tələbəsi Ugudey Nəsirov çıxış edib. O, İsveçrə Konfederasiyasının qanunvericiliyində soyqırımı anlayışının təhlilini verib, 1918-ci ilin martında erməni daşnaklarının azərbaycanlılara qarşı törətdiyi cinayəti soyqırım kimi xarakterizə edib. AİMM-in rəhbəri Qasım Nəsirov isə çıxışında ermənilərin Cənubi-Qafqaz regionuna köçürülməsi tarixinə toxunub. O, müxtəlif dövrlərə məxsus xəritələri tədbir iştirakçılarına nümayiş etdirərək, Ermənistan adlı toponimin Cənubi Qafqazda tarixən mövcud olmadığı faktını tədbir iştirakçılarının diqqətinə çatdırıb, ermənilərin regiona Gülüstan və Türkmənçay müqavilələri nəticəsində köçürüldüyünü vurğulayıb.

Daha sonra tədbirdə Azərbaycan Xalq Cumhuriyyətinin Paris Sülh Konfransına ezam etdiyi nümayəndə heyətinin keşməkeşli taleyindən bəhs edən “Əbədi ezamiyyət” sənədli filmi nümayiş etdirilib. Tədbirin sonunda qonaqlara Azərbaycanın milli təamlarından ibarət ziyafət verilib.(Azərtac)