Azərbaycan yazıçısı, dramaturq və publisisti Elçin Hüseynbəylinin “Boz eşşəyin məktubları” adlı seçilmiş hekayələr toplusu Vilnüsdə litvaca nəşr olunub. Kitaba müəllifin 1998-2014-cü illərdə yazdığı 16 hekayəsi salınıb. Bunlardan altısı - “Boz eşşəyin məktubları”, “Gözünə gün düşür”, „İlk öpüş“, “Şimallı gəlin”, “Qocanın axdığı gün”, “Qaracanın qara başı” - Qarabağ savaşı mövzusunda qələmə alınmış və diqqəti cəlb edən məşhur əsərlər sırasına daxildir.

Əsərləri orijinaldan Litva dilinə dünya karay türklərinin ünlü simalarından biri, görkəmli Litva ictimai-mədəni xadimi və diplomat, Litvanın Azərbaycan və Türkiyədəki sabiq səfiri, Azərbaycan Yazıçılar Birliyinin fəxri üzvü Halina Kobetskayte və Litva Azərbaycanlıları Cəmiyyətinin sədri, tanınmış ədəbiyyatşünas-araşdırmaçı, publisist və mütərcim Mahir Həmzəyev tərcümə ediblər.

Kitab Litva Azərbaycanlıları Cəmiyyəti tərəfindən 500 nüsxədən ibarət tirajla nəşr edilərək yayımlanıb və həmçinin ölkənin bütün böyük kitabxanalarının fondlarına təqdim olunaraq geniş oxucu auditoriyasının ixtiyarına verilib.

Bu barədə məlumat verən Mahir Həmzəyev bildirib ki, 1988-ci ildə Vilnüsdə yaradılmış Litva Azərbaycanlıları Cəmiyyətinin prioritet fəaliyyət istiqamətlərindən biri Ermənistan-Azərbaycan, Qarabağ münaqişəsi ilə bağlı həqiqətləri, tarixi faktları həm də bədii üsullarla Litva ictimaiyyətinə çatdırmaq, bununla əlaqədar ölkədə təbliğat və maarifləndirmə tədbirlərinin innovativ üsullarını tətbiq etmək, Ermənistanın işğalçı siyasətini ifşa edərək onu qınaq hədəfinə çevirmək, problemin ədalətli həllinə Litva Respublikası Seymi və Hökuməti tərəfindən siyasi dəstəyin verilməsi üçün akademik layihələr çərçivəsində effektli tədbirlər görməkdən ibarətdir.

İndiyədək Cəmiyyət tərəfindən bu yönümdə bir sıra konkret işlər görülüb. E. Hüseynbəylinin kitabının Litva dilində nəşri də ilk növbədə göstərilən məqsədlərə xidmət edir.(qhtxeber.az)