Azərbaycana qarşı təkcə “X” sosial platforması üzərindən deyil, bütün digər, əslində hibrid informasiya savaşının elementi və geosiyasi təzyiq aləti kimi istifadə olunan şəbəkələr üzərindən də böhtan və qarayaxma kampaniyaları aparılır. Saxta hesablar yaratmaqla təxribat şəbəkəsi elementlərinin sayının çoxaldılması isə xüsusi proqramlar əsasında həyata keçirilir ki, bu da prosesin xarici xüsusi xidmət orqanlarının əli ilə reallaşdırıldığını, həmçinin vahid mərkəzdən idarə olunduğunu sübuta yetirir. Sosial platformalarda və kollektiv Qərbin bəzi ölkələrinin media resurslarında yer alan tezisləşdirilmiş böhtan və yalanların bir-birini təkrarladığını, həmçinin bir sıra “beynəlxalq” təsisatların, Avropa Parlamentinin, xüsusilə də ABŞ senatı və konqresinin, eləcə də oxşar uydurma ittihamların “azərbaycanlı” olduqlarını iddia edən bəzi təsir agentləri tərəfindən də dilə gətirildiyini nəzərə alsaq sifarişin haradan verildiyini və hansı məqsəd daşıdığını müəyyənləşdirmək mümkündür.

Fact-info.az xəbər verir ki, bu fikirləri AZƏRTAC-a açıqlamasında Milli Məclisin deputatı Elçin Mirzəbəyli söyləyib.

Onun sözlərinə görə, təxribat kampaniyasının bütün iştirakçıları tutuquşu kimi Azərbaycanın yeni qaz yataqlarının kəşfinə və istismarına sərmayə yatırdığını bildirir və qeyd edirlər ki, ətraf mühitin qorunması ilə enerji sektorunun inkişafı istiqamətində atılan addımlar bir-birinə ziddir. Halbuki, qeyd olunanlar bəzi Qərb dövlətlərinin özlərinə aiddir: “Təkcə Norveçin 2024-cü ildə neft və qaz sektoruna yatırdığı sərmayənin həcmi 24 milyard ABŞ dolları təşkil edir. 2025-ci ildə isə Norveç hökuməti etni sektora 22,5 milyard vəsait yatırmağı planlaşdırır. Həmçinin Birləşmiş Ştatların öz ərazisində, eləcə də digər ölkələrdə sıxılmış qazın istehsalına yatırdığı sərmayələrin miqyasını Azərbaycanla müqayisə etmək belə mümkün deyil. Amma bəlli olduğu kimi, bu ölkələrin adlarını kimsə çəkmir”.

Milli Məclisin deputatı onu da diqqətə çatdırıb ki, Qərb Rusiya ilə açıq-aşkar savaşda olduğuna baxmayaraq, cari il ərzində bu ölkədən təbii qaz alışını 24 faiz artırıb və yenə də bu istiqamətdə addımlar atmaq niyyətindədir: “Eyni zamanda, Avropa İttifaqının təbii qaza olan ehtiyacını ödəmək və eyni mənbədən asılılığını azaltmaq üçün “döymədiyi qapı” yoxdur”.

Mənzərə göz qabağındadır. Əgər təbii qaz bu qədər pisdirsə, qoy Qərb ölkələri ondan tamamilə imtina etsinlər, yaxud Norveçin və digər ölkələrin neft və qaz sektoruna on milyardlarla dollarla ölçülən investisiyalarını pisləsinlər. Bunlarda nəinki ədalət və ləyaqət hissi, hətta adi, bəsit məntiq belə yoxdur və total şəkildə beynəlxalq ictimai rəyin “gözünə” kül üfürməklə nəticə əldə edəcəklərini düşünürlər. COP29 bütün böhtan və qarayaxma kampaniyalarına rəğmən yüksək səviyyədə təşkil olunacaq və iqlim dəyişiklikləri ilə mübarizəyə yeni töhfələr verəcək”.