Müsahibədə Elnur Sultanov Azərbaycan-Latviya mədəni əlaqələrinin tarixi haqqında danışaraq, ölkəmizdə yaşayıb-yaratmış latviyalı mədəniyyət xadimləri, o cümlədən yazıçılar Ernest Birznieks-Upitis, Yanis Yaunsudrabinş, bəstəkar və dirijor Yazep Medinş, rəssam Yuliy Straume və digər şəxslərin yaradıcılığı haqqında məlumat verib.

UNESCO-nun siyahısında yer alan Azərbaycanın qeyri-maddi mədəni irs nümunələrindən bəhs edən Elnur Sultanov Latviyanın bir sıra şəhərlərində, o cümlədən Riqa və Qulbenedə ənənəvi olaraq ölkəmizin mədəni irsini tərənnüm edən maraqlı və yaddaqalan tədbirlərin keçirildiyini xatırladıb.

O, Azərbaycanda bu il qeyd edilən “Şuşa İli”ndən, dahi Azərbaycan bəstəkarı Fikrət Əmirovun 100 illik yubileyi çərçivəsində həyata keçirilən tədbirlərdən danışıb.

Nizami Gəncəvi Beynəlxalq Mərkəzi haqqında da məlumat verən diplomat bu Mərkəzin fəaliyyətində Latviyanın üç sabiq Prezidentinin iştirak etdiyini vurğulayıb və Latviya Respublikasının Prezidenti Eqils Levitsin IX Qlobal Bakı Forumunun iştirakçılarına müraciətinə toxunub.

Diqqətə çatdırılıb ki, bu gün multikulturalizm Azərbaycanda həm həyat tərzidir, həm də mövcud mədəni, dil və etnik müxtəlifliyin qorunub saxlanılmasına yönəlmiş və uğurla həyata keçirilən dövlət siyasətidir. E.Sultanov 2008-ci ildə Azərbaycan Prezidentinin təşəbbüsü ilə başlanmış və mədəniyyətlərarası dialoqun təşviqinə yönəlmiş “Bakı Prosesi”nin hazırda beynəlxalq gündəmdəki aktual problemlərin müzakirəsi və həlli yollarının tapılması üçün aparıcı qlobal platformaya çevrildiyini vurğulayıb.