Dilqəm Əsgərov və Şahbaz Quliyev Beynəlxalq Qızıl Xaç Komitəsinin (BQXK) əməkdaşları Kəlbəcərdə ermənilər tərəfindən girov götürülən azərbaycanlılar - Dilqəm Əsgərov və Şahbaz Quliyevə baş çəkiblər. BQXK-nın Azərbaycan nümayəndəliyindən ANS PRESS-ə verilən məlumata görə, girovlara mart ayının 10-da baş çəkilib. 

Şuşa həbsxanasında saxlanılan azərbaycanlılara ailələrindən məlumatlar çatdırılıb, onlardan da ailələri üçün məlumat alınıb. 

2014-cü ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını, yaxınlarının məzarlarını ziyarət etmək istəyərkən Ermənistan əsgərləri tərəfindən girov götürülüblər. Digər Azərbaycan vətəndaşı Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib.

Ötən il Dağlıq Qarabağ separatçı rejimində D. Əsgərov və Ş. Quliyev üzərində “məhkəmə” qurulub. “Məhkəmə”nin qərarı ilə D. Əsgərov ömürlük, Ş. Quliyev isə 22 il müddətinə azadlıqdan məhrum edilib.

Bir neçə dəfə əfv barədə Dilqəm Əsgərova müraciət olunsa da həmyerlimiz bundan imtina edib və belə bir arzusunun olmadığını bildirib. 

Həsən Həsənov - ermənilər tərəfindən öldürülən azərbaycanlı

Beynəlxalq Qızıl Xaç Komitəsinin (BQXK) əməkdaşları Kəlbəcərdə ermənilər tərəfindən girov götürülən azərbaycanlılara sonuncu dəfə fevralın 3-də baş çəkiblər.  Komitə nümayəndələri Şahbaz Quliyev ilə bərabər  Dilqəm Əsgərova da məktub gətirmişdilər.

Ş.Quliyevin bacısı İradə Quliyeva ANS PRESS-ə açıqlamasında qardaşının məktubda vəziyyətinin yaxşı olduğunu yazdığını bildirib. "Məktubda yazıb ki, hər şey yaxşıdır. Məndən narahat olmayın. Heç nə göndərməyin. Anam üçün çox darıxmışam”, - deyə bacısı əlavə edib.

İradə Quliyevanın sözlərinə görə, Qırmızı Xaç Komitəsinin nümayəndələri  ona qardaşının şəklini göstəriblər. “Məhkəmədə necə idisə, indi də elə o vəziyyətdədir.  Nə arıqlayıb, nə də kökəlib. Mən də Şahbaza öz şəkillərimizi göndərmişəm. 3-4 cümləlik bir məktubdur. Qızı ilə də məktublaşır”, - deyə İradə Quliyeva bildirdi.