Azərbaycan Milli Elmlər Akademiyasının (AMEA) Elm Tarixi İnstitutunun (ETİ) əməkdaşları ölkədə tətbiq edilmiş karantin rejimi ilə əlaqədar öz fəaliyyətlərini onlayn rejimə uyğunlaşdırıblar.

Koronavirus pandemiyası səbəbindən verilmiş məzuniyyət dövründə tədqiqat işlərini ev şəraitində davam etdirən İnstitut əməkdaşları müxtəlif mövzularda kitab və məqalələrin hazırlanması ilə yanaşı, onlayn seminar və konfranslara da qatılıblar.

Hazırda Elm Tarixi İnstitutunun direktoru, tarix elmləri doktoru Məryəm Seyidbəyli “Azərbaycanda tibbi biliklərin tarixi” mövzusunda işlədiyi kitab üzərində çalışmalarına davam edir. Ötən karantin günlərində İnstitut direktoru Rusiya Elmlər Akademiyasının (REA) S.Vavilov adına Təbiət Elmləri və Texnika Tarixi İnstitutunun 2020-ci il üzrə onlayn keçirilən illik konfransında “Sovet dövrü Azərbaycan tibb alimlərinin tarixi – elmi bioqrafiyalarının hazırlanması” adlı məruzə ilə iştirak edib. Məruzə konfransın materiallarında nəşr ediləcək. Eyni zamanda, M.Seyidbəyli 31 may 2020-ci il tarixində İtaliyada “Elm və texnologiya tarixi” mövzusunda onlayn keçiriləcək 26-cı Beynəlxalq elmi konfransa “N.Tusininin “Risale at tibb” adlı məqaləsinin xülasəsini təqdim edib. İnstitutun digər əməkdaşı Elmi katib, siyasi elmlər üzrə fəlsəfə doktoru, dosent Zaur Əliyev “Amerika-Türkiyə münasibətlərində erməni soyqrımı” mövzusunda hazırladığı kitabın tədqiqat işləri ilə məşğuldur.

Tarixşünaslıq və mənbəşünaslıq şöbəsinin müdiri, tarix üzrə fəlsəfə doktoru, dosent Ziyad Əmrahov isə “Azərbaycan Xalq Cümhuriyyəti dövründə elm və təhsilin inkişafı” adlı plan işini yazaraq başa çatdırıb.

Tarixşünaslıq və mənbəşünaslıq şöbəsinin əməkdaşı, tarix üzrə fəlsəfə doktoru Bayram Quliyev də öz növbəsində “Azərbaycan tarixinin farsdilli qaynaqları” və “Orxon abidələri: qrammatika, transliterasiya, uyğunlaşdırma, qeyd və şərhlər” mövzularında yeni araşdırma işinə başlamış, “Mirzə Rəfianın “Dəsturül-müluk” əsəri Azərbaycan hüquq tarixinin öyrənilməsi kimi”, “The Characteristics of science in period of İlkhanates”, “The work of “Zeyl-i tarikh-i Guzida” of Zeynalabidin Muhammad Qazvini (translation and explanations)” adlı elmi məqalələrini bitirərək çapa təqdim etmişdir. Gənc alim, həmçinin türkologiyaya həsr olunmuş onlayn seminarda da iştirak edərək, “Kitabi Dədəm Qorqudun araşdırılma tarixindən” mövzusunda məruzə ilə çıxış edib. Elmi işçilərdən – Aybəniz Osmanova “Azərbaycanda riyaziyyat elminin tarixi”, Vahab Fətəliyev isə “Persiya istilahı qədim və orta əsr mənbələrində”, mövzularında başladıqları kitablarla bağlı çalışmalarını davam etdirirlər.

Bu müddət ərzində Elmşünaslıq və elmin sosial problemləri şöbəsinin müdir əvəzedicisi, fəlsəfə elmləri doktoru, dosent Ələddin Məlikov “İmmanuel Kant və müsəlman arif və filosofların təfəkküründə metafizik epistemologiyanın müqayisəsi”, “Fars dilində məsdər və kökləri cədvəlinin hazırlanması”, “Görkəmli Azərbaycan filosofu Molla Rəcəbəli Təbrizinin həyatı, yaradıcılığı, əsərləri və nəzəriyyələri haqqında”, Baş elmi işçi, hüquq üzrə elmlər doktoru, dosent Zaur Məmmədov “Azərbaycanın mülki prosessual hüquq elminin inkişaf tarixi”, “Konstitusiya məhkəməsi haqqında Azərbaycan Respublikası qanunvericiliyinin inkişaf tarixi”, sosiologiya elmləri üzrə fəlsəfə doktoru Səadət Məmmədova “Социальное государство: перспективы развития в мире и в Азербайджане”, “Azərbaycanda Sovet dövründə sosiologiya elminin inkişafı”, Tərcümə və informasiya şöbəsinin müdiri, elmi işçi Aynur Xubanova “Qloballaşma və mədəniyyət: Azərbaycan faktoru”, “Sov. İKP MK-nin arxiv materialları əsasında Azərbaycan dili”, elmi işçi, Baş laborant Solmaz Namazova ümummilli lider Heydər Əliyevin anadan olmasının 97-ci ildönümünə həsr olunmuş “Heydər Əliyev: multikulturalizm və tolerantlıq ideologiyası”, “Qloballaşan dünyada dillərin və mədəniyyətlərin dialoqu”, elmi işçi Aybəniz Osmanova “Avropada riyaziyyat elminin təşəkkülü və inkişafı (orta əsrlər - XX əsrin əvvəlləri)”, elmi işçi Röya Mirzəbəyova “Orta əsrlərdə dünyəvi elmlərin İslam mədəniyyətində birgəyaşayışa təsiri”, “Orta əsr İslam fəlsəfəsində əlkimya (ingilisdilli qaynaqlarda)” mövzularında elmi məqalələrini çapa təqdim etmək üçün hazırlayıb tamamlamışlar.

Qeyd edək ki, hazırda İnstitutun əməkdaşları Azərbaycanın tanınmış mütəfəkkirləri, görkəmli ədiblər – Nəriman Nərimanov və Əbdürrəhim bəy Haqverdiyevin 150 illik yubileyi ilə əlaqədar keçirilməsi planlaşdırılan konfrans və seminar üçün material toplayır, habelə elmşünaslığla bağlı tədbirin hazırlıq işini davam etdirirlər.

Gülşən Məmmədoğlu

ETİ İctimaiyyətlə əlaqələr şöbəsi