Böyük şair və dramaturq Hüseyn Cavidin oğlu Ərtoğrol Cavidin tədqiq və tərtib edərək rəy verdiyi materiallar əsasında hazırlanmış “Azərbaycan qeyri-maddi mədəniyyət abidələri və Ərtoğrol Cavid” çoxcildliliyinin son üç cildi nəfis tərtibatla nəşr olunub.
Bu müəssisənin direktoru, filologiya elmləri doktoru Gülbəniz Babaxanlının tərtib etdiyi “Balaman məktəbi” dərsliyi və Ərtoğrol Cavid”, “Ərtoğrol Cavidin nota köçürdüyü xalq mahnıları” və “Ərtoğrol Cavidin yarımçıq qalmış əsərləri” nəşr olunub. 
“Balaman məktəbi” Azərbaycan musiqişünası Saleh Əbdüləlimovun musiqi məktəbləri üçün tərtib etdiyi dərslikdir. Dərslik 1937-ci ildə hazırlansa da, o dövrdə ermənilərin bədxahlığı nəticəsində çap olunmayıb və əsərin orijinal nüsxəsi Ərtoğrol Cavidin şəxsi arxivində uzun illər mühafizə edilib. Parlaq istedada və yüksək intellektə malik olan Ərtoğrol Cavid “Balaman məktəbi”nə rus dilində yazılmış ön sözü dilimizə tərcümə edib, dərsliyin tərtibi ilə əlaqəli materialların toplanıb-hazırlanmasında yaxından iştirak edib. 
“Ərtoğrol Cavidin nota köçürdüyü xalq mahnıları” adlı cilddə xalq muğamlarının toplanması və nota salınması sahəsində böyük zəhməti olmuş Ə.Cavidin xanəndə Cabbar Bağdadbəyovun ifasında dinlədiyi “Bayatı kürd təsnifi”, “Segahın mübərriqəsi”, “Zəminxara təsnifi”, “Orta segah rəngi”, “Mirzə Hüseyn segahı” kimi muğamların nota salınmış versiyası əks olunub. “Ərtoğrol Cavidin yarımçıq qalmış əsərləri” cildində AMEA Hüseyn Cavidin Ev Muzeyində mühafizə edilən, Ərtoğrol Cavidə məxsus bir sıra yarımçıq musiqi əsərləri toplanıb.