Qərbi Azərbaycan mövzusunda tədbirlər yalnız Türkiyədə deyil, dünyanın digər ölkələrində də dövlət xadimləri, siyasətçilər və alimlərin iştirakı ilə keçirilməlidir ki, dünya ictimaiyyəti müasir Ermənistan ərazisindəki tarixi torpaqlardan qovulmuş azərbaycanlıların taleyindən xəbərdar olsun.

Bu fikirləri Türkiyə Milli Müdafiə Universitetinin Quru Qoşunları Məktəbinin dekanı, professor İbrahim Ethem AtnurAnkarada keçirilmiş “Qərbi Azərbaycana qayıdış insan hüquqlarının aliliyinin təminatıdır” mövzusunda beynəlxalq konfransın əhəmiyyətini şərh edərkən söyləyib.

Onun sözlərinə görə, Qərbi Azərbaycanın reallıqlarının təbliği Cənubi Qafqazın bu bölgəsinin yerli əhalisinin zəngin irsinin və mədəniyyətinin unudulmamasına da xidmət edən bir yoldur. “Qərbi Azərbaycan haqqında təkcə siyasətçilər və alimlər deyil, həm də qeyri-hökumət qurumları, insan hüquqları təşkilatları, media strukturları və nəhayət, sadə vətəndaşlar danışmalıdır”, – deyə Türkiyə universitetinin dekanı qeyd edib və elmi nəşrlərin auditoriyasının məhdudluğuna diqqət çəkib.

İ.E.Atnur əminliklə bildirib ki, Qərbi Azərbaycan sakinlərinin dəfələrlə yaşadığı faciə və ağrı dünya ölkələrinin ictimaiyyətinə çatdırılmalıdır. “Ankarada keçirilmiş tədbir kimi böyük tədbirlər geniş auditoriyanı məlumatlandırmaq üçün təkan ola bilər və olmalıdır. Bu məsələnin unudulmasına imkan verə bilmərik”, – deyə Türkiyə Milli Müdafiə Universitetinin professoru vurğulayıb.

İ.E. Atnur diqqəti bu fakta yönəldib ki, bu gün Qarsda, İğdırda, Ərzurumda və Anadolunun bir çox digər bölgələrində Qərbi Azərbaycanı tərk etməyə məcbur qalmış azərbaycanlıların yüz minlərlə nəvəsi yaşayır. “Bu insanlar Qərbi Azərbaycan sakinlərinin faciəsi haqqında məlumatı nəsildən-nəslə ötürürlər. Lakin, təəssüf ki, geniş ictimaiyyət bu mövzu haqqında məlumatsızdır. Bir çoxları müasir Ermənistan ərazisində azərbaycanlılara məxsus mədəni və memarlıq abidələri haqqında heç nə bilmir. Onların böyük əksəriyyəti artıq ermənilər tərəfindən məhv edilib”, – deyə türkiyəli alim qeyd edib.