Azərbaycan Xalq Cümhuriyyəti müstəqilliyə nail olmaqla, 114 min kv. km ərazini dünyaya tanıtmaqla müasir dövlətçiliyimizin əsasını qoyub. Mayın 28-də Azərbaycan Xalq Cümhuriyyətinin yaradılmasının 107-cı ildönümü tamam olur. 1918-ci il mayın 28-də Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan edərək xalqımızın çoxəsrlik dövlətçilik ənənələrini davam etdirib. Cümhuriyyət müstəqil, azad, demokratik respublika qurmaq məqsədini qarşıya qoymuşdu. Ona görə də, 28 May –Müstəqillik Günü xalqımız üçün ən dəyərli və müqəddəs bayramlardan biridir. Hər bir Azərbaycan vətəndaşı bu tarixi qürur hissi ilə qeyd edir.

44 günlük Vətən müharibəsinin iştirakçısı,  tanınmış cərrah Anar Yusibov bu şərəfli tariximizə nəzər salır:

 “Gerçəkdən Azərbaycan Xalq Cümhuriyyəti bizim şərəfli tariximizdir.  İlk Bəyannaməsini Məhəmməd Əmin Rəsulzadənin başçılığı ilə Tiflisdə élan edən bu, cümhuriyyət sonra Gəncəyə köçüb. Tarixdən məlumdur ki, bu insanlar çox ağır şəraitdə çalışıblar. Bakı işğalçılardan azad edildikdən sonra bütün hakimiyyət paytaxtda cəmləşib.  AXC-nin ömrü qısa  olsa da, çox fədakarlıqla çalışıblar. 23 ay ərzində bu insanlar əzmlə  çalışaraq Şərqdə ilk demokratik  dövlət qurublar. Təhsilin inkişafının zərurətini dərk edən AXC rəhbərliyi xeyli sayda azərbaycanlı gənci xarici ölkələrə təhsil almağa  göndəriblər. Bütün sahələrdə dövlət quruculuğu işləri aparılıb.  Amma işğalçı qüvvələr milli hakimiyyətin fəaliyyətini qəbul edə bilmədilər. Beləliklə, Xalq Cümhuriyyətinə qəsd etdilər.

Amma  70 ildən sonra,  1991-ci ildə Azərbaycan yenidən müstəqilliyinə qovuşdu. Bu gün biz Cümhuriyyət qurucularına borcluyuq. Onları ehtiramla anırıq. Həmin liderlərin ideyaları gerçəkləşdi. Bu gün biz  müstəqilliyimizin əbədi olduğunu dərk edirik. Azərbaycanın ərazi bütövlüyü  təmin edilib. Cümhuriyyət qurucuları məhz bunu arzulayırdılar. Torpaqlarımızın, Vətənimizin azadlığı uğrunda Şəhid olmuş bütün qəhrəmanlarımıza Allahdan rəhmət diləyirəm.

   Fact-info.az