Azərbaycan xalqının müasir tarixində elə hadisələr var ki, onların əhəmiyyəti yalnız müəyyən bir dövrün deyil, bütövlükdə dövlətin və millətin taleyinin müəyyənləşdirilməsi ilə ölçülür. 15 İyun – Milli Qurtuluş Günü məhz belə tarixi hadisələrdən biridir. Bu gün Azərbaycan dövlətçiliyinin qorunub saxlanılması, siyasi sabitliyin təmin edilməsi və müstəqil inkişaf yolunun müəyyənləşdirilməsi baxımından müstəsna əhəmiyyətə malikdir.

XX əsrin sonlarında Sovet İttifaqının dağılması nəticəsində Azərbaycan dövlət müstəqilliyini bərpa etsə də, ölkə mürəkkəb siyasi, iqtisadi və hərbi problemlərlə üzləşmişdi. Ermənistanın Azərbaycana qarşı təcavüzü, torpaqların işğalı, iqtisadi tənəzzül, hakimiyyət uğrunda mübarizə və dövlət idarəçiliyindəki ciddi problemlər ölkəni dərin böhran vəziyyətinə salmışdı. Xüsusilə 1993-cü ilin yayında yaranmış siyasi qarşıdurmalar və vətəndaş müharibəsi təhlükəsi Azərbaycan dövlətinin mövcudluğuna ciddi təhdid idi.

Belə bir mürəkkəb şəraitdə xalqın təkidli tələbi ilə Ümummilli Lider Heydər Əliyev siyasi hakimiyyətə qayıtdı. 1993-cü il iyunun 15-də Heydər Əliyev Azərbaycan Respublikası Ali Sovetinin sədri seçildi. Bu hadisə ölkənin siyasi həyatında dönüş nöqtəsinə çevrildi və sonradan Azərbaycan tarixində Milli Qurtuluş Günü kimi qeyd olunmağa başladı. Bu hadisənin əsas məzmununu Azərbaycan dövlətçiliyinin dağılmaq təhlükəsindən xilas edilməsi, ictimai-siyasi sabitliyin bərpası və milli həmrəyliyin təmin olunması təşkil edir. Heydər Əliyevin siyasi uzaqgörənliyi və idarəçilik təcrübəsi nəticəsində ölkədə vətəndaş qarşıdurmasının qarşısı alındı, dövlət institutlarının fəaliyyəti bərpa edildi və hüquqi dövlət quruculuğu istiqamətində mühüm addımlar atıldı.

Məhz bu tarixdən sonra müstəqil Azərbaycan dövlətinin inkişaf strategiyası müəyyənləşdirildi, ölkənin beynəlxalq aləmdə mövqeləri möhkəmləndirildi və milli maraqlara əsaslanan xarici siyasət kursu formalaşdırıldı. 1994-cü ildə imzalanmış neft müqavilələri, beynəlxalq əlaqələrin genişləndirilməsi, ordu quruculuğunun gücləndirilməsi və iqtisadi islahatların həyata keçirilməsi Azərbaycanın gələcək inkişafının əsasını təşkil etdi.

Qurtuluş fəlsəfəsinin mühüm istiqamətlərindən biri də milli dövlətçilik ideologiyasının möhkəmləndirilməsi oldu. Azərbaycançılıq məfkurəsinin dövlət siyasətinin əsas istiqamətlərindən birinə çevrilməsi milli birliyin, vətəndaş həmrəyliyinin və dövlətə bağlılığın güclənməsinə səbəb oldu. Bu ideologiya ölkənin etnik, dini və mədəni müxtəlifliyini vahid dövlətçilik maraqları ətrafında birləşdirən mühüm amilə çevrildi.

Bu gün, haqlı olaraq, müasir Azərbaycanın əldə etdiyi nailiyyətlər, beynəlxalq nüfuzu, iqtisadi inkişafı və hərbi qüdrəti 1993-cü ildə başlanmış siyasi sabitlik və dövlət quruculuğu proseslərinin məntiqi nəticəsi kimi qiymətləndirilir. Azərbaycanın ərazi bütövlüyünün və suverenliyinin tam bərpası istiqamətində əldə olunan tarixi uğurlar da məhz həmin dövrdə formalaşdırılmış güclü dövlətçilik təməllərinə söykənir.

Fərrux Rüstəmov,
ADPU-nun İbtidai təhsilin pedaqogikası kafedrasının müdiri,pedaqoji elmlər doktoru, professor, Əməkdar elm xadimi, Qərbi Azərbaycan İcmasının Ziyalılar Şurasının sədr müavini