Əlişir Nəvai adına Daşkənd Dövlət Özbək Dili və Ədəbiyyatı Universitetində “Əlişir Nəvai və Məhəmməd Füzuli: Özbəkistan–Azərbaycan ədəbi əlaqələrinin inkişafı məsələləri” mövzusunda beynəlxalq konfrans keçirilib. Tədbir universitetlə Azərbaycanın Özbəkistandakı səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzinin birgə təşkilatçılığı ilə baş tutub.

 Fact-info.az xəbər ki, tədbirdə çıxış edən universitetin gənclərlə iş və mənəvi-maarif sahələri üzrə birinci prorektoru Gulnoza Jorayeva Şərqin iki görkəmli mütəfəkkirinin mənəvi irsinin öyrənilməsinin əhəmiyyətini və Özbəkistan ilə Azərbaycan arasında elmi və mədəni əməkdaşlığın humanitar əlaqələrin möhkəmlənməsində xüsusi rol oynadığını qeyd edib.

Prorektor bildirib ki, Nəvai və Füzulinin irsi qardaş xalqların ümumi sərvəti olmaqla ədəbi dialoqun etibarlı əsasını təşkil edir və universitet türkologiya istiqamətinin inkişafına, eləcə də Azərbaycan elmi müəssisələri ilə əməkdaşlığın genişləndirilməsinə xüsusi diqqət ayırır.

Daha sonra çıxış edən Özbəkistandakı Heydər Əliyev adına Azərbaycan Mədəniyyət Mərkəzinin direktoru Akif Marifli Füzuli irsinin ümumtürk mədəni məkanındakı yerindən danışaraq “Leyli və Məcnun” poemasının Şərq ədəbiyyatında eşq fəlsəfəsinin zirvəsi olduğunu deyib. Direktor vurğulayıb ki, Füzuli eşqi yalnız poetik ifadə kimi deyil, insanın mənəvi kamillik yolunun bədii təcəssümü kimi təqdim edir və bu yanaşma onun yaradıcılığını əsrlər boyu aktuallığını qoruyan klassikaya çevirir.

Akif Marifli, həmçinin Əlişir Nəvainin yalnız özbək ədəbi məktəbinin deyil, bütün türk dilli klassik ədəbiyyatın zənginləşməsində müstəsna rol oynadığını, onun əsərlərinin türkdilli xalqlar arasında ədəbi və mənəvi birliyin genişlənməsinə xidmət etdiyini diqqətə çatdırıb. O qeyd edib ki, Nəvai və Füzuli kimi klassiklər arasında mövcud ideya-bədii bağlılıqlar Azərbaycan-Özbəkistan ədəbi əlaqələrinin mühüm mənəvi dayaqlarından biridir.

Tədbirdə Əlişir Nəvai adına Daşkənd Dövlət Özbək Dili və Ədəbiyyatı Universitetinin professoru Nurbay Jabbarov, Özbəkistan Yazıçılar Birliyinin sədr müavini şair Qayrat Məcid və digərləri çıxış edərək Nəvai və Füzuli poeziyasının bədii-fəlsəfi qatları, klassik irsin iki ölkə arasındakı mədəni bağların inkişafındakı rolu və şeirlərin müasir dövrdə tədrisi ilə bağlı məruzələrini təqdim ediblər.

Tədbirə Azərbaycandan onlayn formatda qoşulan alim və tədqiqatçılar Nəvai və Füzuli irsinin yeni elmi yanaşmalarla öyrənilməsi, tərcümə ənənələri və ədəbi əlaqələrin genişləndirilməsi perspektivləri barədə çıxışlar ediblər.

Bədii hissədə Məhəmməd Füzuli adına Azərbaycan Mədəniyyəti, Təhsil və Tədqiqat Mərkəzinin tələbələrdən ibarət “Füzuli dilbəndləri” kollektivi şairlərin qəzəl və poetik parçalarını səsləndiriblər.