Kiprdə uzunmüddətli və davamlı tənzimləmə yalnız adanın reallıqlarının tanınması şərti ilə mümkündür. Danışıqlar üçün ümumi zəmin olmadan dialoqun bərpası mümkün deyil.

Bu barədə Şimali Kipr Türk Cümhuriyyətinin (ŞKTC) Prezidenti Ersin Tatar BMT Baş katibinin Kiprdəki xüsusi nümayəndəsi Kolin Stüartla görüşdə bildirib.

ŞKTC liderinin sözlərinə görə, Lefkosa adanın yunan icması ilə “iki müstəqil və suveren dövlət” prinsipi əsasında əməkdaşlığa hazırdır.

BMT Təhlükəsizlik Şurasında Kiprin federal quruluşu ilə bağlı səslənən çağırışları şərh edən E.Tatar qeyd edib: “Bu mövzu aktuallığını itirib. Bu məsələ ilə bağlı razılaşma məhz Yunanıstan tərəfinin günahı üzündən əldə olunmayıb”.

Prezident 4 il əvvəl Cenevrədə Kipr məsələsi ilə bağlı aparılan danışıqları xatırladıb. “Yunanıstan tərəfinin destruktiv mövqeyinə cavab olaraq, Lefkosa iki bərabər suveren dövlətin beynəlxalq statusunun tanınması konsepsiyası ilə çıxış edib”, - deyə siyasətçi BMT Təhlükəsizlik Şurasının Kiprlə bağlı qəbul etdiyi qətnamələri “müasir dövrün tələblərinə cavab verməyən sənədlər” adlandırıb.

“Bu gün tamamilə fərqli vəziyyət yaranıb. Şərqi Aralıq dənizində vəziyyət dəyişib. Türkiyə də keyfiyyətcə fərqli inkişaf səviyyəsindədir”, - deyə E.Tatar, ŞKTC səlahiyyətlilərinin adadakı ziddiyyətlərin “iki dövlət” prinsipi əsasında həllində israrlı olduğunu vurğulayaraq qeyd edib.