Son illər ərzində ölkəmizdə memarlıq irsinin qorunması sahəsində mühüm addımlar atılıb. Xüsusilə işğaldan azad olunmuş ərazilərdə tarixi abidələrin tədqiqi və qorunması istiqamətində sistemli işlər görülür. Həmin ərazilərdə genişmiqyaslı araşdırmalar aparılıb, minalardan təmizlənmiş ərazilərə baxış keçirilib və kifayət qədər məlumat toplanıb. Bu tədqiqatlar nəticəsində artıq 44 abidə dövlətin mühafizə olunan abidələr siyahısına daxil edilib. Bu, çox mühüm və tarixi əhəmiyyətli bir addımdır. Eyni zamanda, bu sahədə fəaliyyət göstərən ekspert komissiyası yaradılıb və hazırda intensiv rejimdə fəaliyyət göstərir.

Fact-info.az xəbər verir ki, bu fikirləri Azərbaycan Memarlıq və İnşaat Universitetinin rektoru, Əməkdar memar Gülçöhrə Məmmədova parlamentin Mədəniyyət komitəsinin bu gün keçirilən ictimai dinləməsində çıxışı zamanı səsləndirib.

G.Məmmədova qeyd edib ki, ekspert komissiyası tərəfindən 100-dən çox abidəyə baxış keçirilib, o cümlədən tamamilə dağıdılmış, yerində olmayan memarlıq nümunələri də nəzərdən keçirilir və onların bərpası ilə bağlı müzakirələr aparılır: “Bu prosesdə ictimai iştirakçılığın təmin olunması vacibdir. Tarixi abidələrin bərpası olduqca həssas məsələdir. Bir memar müasir binanın layihəsini verə bilər və əgər nəticə uğursuz alınarsa, həmin binanı dəyişmək mümkündür. Lakin tarixi abidə ilə bu yanaşma tətbiq oluna bilməz, onun yerini heç nə ilə əvəz etmək mümkün deyil. Bu səbəbdən bərpa layihələrinin hazırlanması zamanı müəyyən baxışlar keçirilməli, müxtəlif peşəkar və ictimai rəy nəzərə alınmalıdır. Memarlıq irsinin bərpası sahəsində şəffaf, elmi əsaslara söykənən və ictimaiyyətin iştirakı ilə aparılan proseslər Azərbaycanın milli kimliyinin və tarixinin qorunmasında mühüm rol oynayır. Bu, həm də xalqımızın tarixi yaddaşının yenidən dirçəldilməsi deməkdir”.