Türkiyə arxivlərində erməni quldur dəstələri tərəfindən Anadoluda azı 550 min dinc sakinin qətlə yetirildiyini sübut edən danılmaz sübutlar mövcuddur. Fact-info.az xəbər verir ki, bu barədə iyunun 25-də Türkiyənin "Yeniçağ" qəzeti yazıb.

Nəşrin məlumatına görə, Osmanlı imperiyasının son illərində baş verən etnik türklərin kütləvi qətlləri Ərzurum, Ərzincan, Trabzon, Van, Bitlis, Qaziantep, Kahramanmaraş, Elazığ və Anadolunun digər bölgələrində qeydə alınıb.

“Erməni silahlı dəstələri qadın, uşaq və qocaların cəsədlərini kütləvi məzarlıqlara atırdılar. Bəzi hallarda insanları diri-diri torpağa basdırır və ya sobalarda yandırırdılar. Təkcə Van bölgəsində 22 900 türk ermənilər tərəfindən qətlə yetirilib”, – deyə qəzet qeyd edir. Məqalədə, həmçinin İğdır və Qarsda aşkarlanmış kütləvi məzarlıqlardan da bəhs olunur.

Yazının müəllifi Hakkı Öznur, eyni zamanda ermənilərin azərbaycanlılara qarşı törətdikləri cinayətlər barədə də oxuculara məlumat verib.

Məqalədə qeyd olunur ki, Anadolunun 21 vilayətində ermənilərin üsyanı baş verib. Qəzet 1915-ci ilin fevralında Van üsyanını misal çəkir və buna cavab olaraq, Osmanlı dövlətinin ermənilərin başqa bölgələrə köçürülməsi qərarını verdiyini xatırladır.

“Ermənilər Osmanlı dövlətinin düşmənləri ilə açıq şəkildə əməkdaşlıq edərək, əsrlərlə birlikdə yaşadıqları türklərə arxadan zərbə vurublar. Qanlı cinayətlər, terror aktları və separatizm nəticəsində baş verən hadisələrin məsuliyyəti bütövlükdə ermənilərin öz üzərinə düşür”, – deyə yazıda vurğulanır.

Məqalədə Türkiyənin qurucusu və ilk Prezidenti Mustafa Kamal Atatürkün “Amerikan Public Ledger” nəşrinə verdiyi müsahibəyə də istinad olunur. Atatürk həmin müsahibədə ermənilərin köçürülməsi qərarının tənqid olunmasının qəbuledilməz olduğunu, bu addımın diversiya və qanlı cinayətlər fonunda zəruri bir tədbir olaraq atıldığını bildirib.

“Atatürk, eyni zamanda ermənilərin qətlə yetirdiyi şəxslərin qohumlarını və yaxınlarını də dəstəkləyib. Belə ki, o, Tələt Paşanın həyat yoldaşı Hayriyyə xanıma aylıq 25 lirə məbləğində təqaüd verilməsi göstərişini verib. Həmçinin Tələt Paşanın cənazəsi 1943-cü ildə Almaniyadan Türkiyəyə gətirilərək İstanbulda dəfn edilib”, – deyə “Yeniçağ” yazır.

Qəzet diqqətə çatdırır ki, bu gün də bəzi ölkələr, o cümlədən Fransa erməni terrorçularının adlarını küçə və meydanlara verərək antitürk mövqeyini davam etdirir. Misal olaraq, 2017-ci il aprelin 21-də Marsel şəhərində Tələt Paşanı 1921-ci ildə qətlə yetirən terrorçu Soqomon Teyleryanın adını daşıyan meydanın açılması göstərilir.