İsveçdə siyasətçilər və xarici səfirliklərin əməkdaşları üçün nəzərdə tutulan “Diplomatic World Sweden” nəşrində Böyük İpək Yolunun müasir davamı olan - sürətlə inkişaf edən Orta Dəhliz haqqında geniş məqalə dərc edilib.

Burada tranzit ərazidən Avropa ilə Asiyanı birləşdirən bu strateji marşrutun əsas memarlarından birinə çevrilmiş Azərbaycanın roluna xüsusi diqqət yetirilir.

Məqalədə vurğulanır ki, əlverişli coğrafi mövqeyi və infrastruktura böyük sərmayə qoyuluşu sayəsində Azərbaycan yeni Avrasiya nəqliyyat məkanının mərkəzi halqasına çevrilib. Orta Dəhliz və ya Trans-Xəzər Beynəlxalq Nəqliyyat Marşrutu bu gün Rusiyadan və ya Süveyş kanalından keçən ənənəvi ticarət yollarına əlverişli alternativdir. Çin və Avropa arasında yüklərin çatdırılma müddətləri 10-15 günə endirilib ki, bu da qlobal böhranlar və logistikanın şaxələndirilməsi zərurəti fonunda bu marşrutu xüsusilə cəlbedici edir.

Materialda mülahizələrindən sitat gətirilən Azərbaycan Prezidentinin köməkçisi Hikmət Hacıyev vurğulayır ki, Azərbaycan üçün Orta Dəhliz sadəcə nəqliyyat layihəsi deyil, mədəniyyətlərarası dialoq və regional əməkdaşlıq alətidir. Onun sözlərinə görə, yollar və ticarət marşrutları sivilizasiyalar arasında körpü kimi ölkənin min illik mədəni irsinin məntiqi davamıdır.

Azərbaycanın rəqəmsal infrastruktur, yaşıl enerji, limanların və dəmir yollarının modernləşdirilməsi sahələrindəki təşəbbüsləri də qeyd olunur. Bakı Limanının, Bakı-Tbilisi-Qars dəmir yolu xəttinin tikintisi və inkişafı, habelə infrastruktur layihələrinin maliyyələşdirməsi - bütün bunlar ölkənin strateji rolunu yerinə yetirmək üçün uzunmüddətli sadiqliyindən xəbər verir.