Azərbaycan Mərkəzi-Asiya ölkələri və Çinin energetika planlarında mühüm rola malikdir.

“Gazeta.uz” elektron nəşri xəbər verir ki, bu fikri Özbəkistanın energetika nazirinin müavini Ümid Mamadaminov “Özbəkistan 24” telekanalına müsahibəsində bildirib.

Onun sözlərinə görə, 2024-cü ildə Özbəkistan, Qazaxıstan və Azərbaycan yaşıl enerji dəhlizi layihəsinə dair Memorandum və Protokol imzalayıblar. Nazir müavini əlavə edib: “Azərbaycan Mərkəzi Asiya, Qafqaz, Avropa, Xəzər və Qara dənizləri vahid enerji dəhlizinə birləşdirmək üçün Qara dənizin dibi ilə kabel çəkməyi planlaşdırırdı. Ölkələrin ötürücü sistem operatorları layihəni həyata keçirmək üçün birgə müəssisə yaradıblar.

2030-cu ildən başlayaraq Özbəkistan bu vasitə ilə ölkə daxilində hasil edilən artıq yaşıl elektrik enerjisini Avropaya ixrac etməyi planlaşdırır”.

Ümid Mamadaminov qeyd edib ki, hazırda Çin və Mərkəzi Asiya ölkələri vahid elektrik şəbəkəsi layihəsini müzakirə edirlər.

O diqqətə çatdırıb: “Özbəkistan Qazaxıstan və Qırğızıstan üzərindən Çinə transsərhəd elektrik ötürücü xətlərinin çəkilməsi üçün hesablamalara başlayıb. Bu layihə regionun enerji sistemlərini birləşdirmək və mövsümi dalğalanmalar əsasında enerji mübadiləsini təmin etmək məqsədi daşıyır. Özbəkistan Mərkəzi Asiya ölkələri və Çinin enerji sistemlərinin inteqrasiyasını dəstəkləyir”.

Nazir müavini bildirib ki, iyunun 17-də Astanada keçirilən ikinci Mərkəzi Asiya-Çin sammiti zamanı Özbəkistan Prezidenti Şavkat Mirziyoyev regional elektrik şəbəkələrinin sinxronlaşdırılmasını, o cümlədən yüksəkgərginlikli elektrik verilişi xətlərinin tikintisi üzrə genişmiqyaslı layihənin həyata keçirilməsini təklif edib. “İnfrastruktur və energetika bu sammitdə ən aktual mövzulardan biri idi. Prezidentimiz xüsusi olaraq Çini Mərkəzi Asiya ölkələri ilə birləşdirən enerji dəhlizinin yaradılması məsələsini qaldırdı. Bu, həm bizim üçün, həm də Çin üçün çox vacib məsələdir”, -deyə o vurğulayıb”.

Onun sözlərinə görə, Daşkənd artıq Özbəkistan, Qazaxıstan və Qırğızıstan ərazisindən Çinə doğru yüksəkgərginlikli transsərhəd elektrik ötürücü xətlərinin çəkilməsi üçün hesablamalara başlayıb. Bu ölkə daha əvvəl Azərbaycan üzərindən Avropaya doğru analoji yaşıl enerji dəhlizi layihəsinə də start verib.

“Müzakirələrdən sonra tərəflər bərpaolunan enerji mənbələrinin inteqrasiyası, enerji sisteminin dayanıqlığının artırılması və etibarlı idarəetmə sisteminin yaradılması üzrə birgə işləmək barədə razılığa gəliblər”, -deyə nazir müavini bildirib.