Parisin məşhur Yelisey Çölləri xiyabanındakı Zəfər Tağı altında Azərbaycan Silahlı Qüvvələri Günü münasibətilə ölkəmizin müstəqilliyi və suverenliyi uğrunda canlarından keçmiş şəhidlərimizin xatirəsi hörmət və ehtiramla yad edilib.  Fact-info.az xəbər verir ki, əvvəlcə döyüş musiqisi sədaları altında Azərbaycan və Fransanın Dövlət bayraqları əraziyə gətirilib. "Zəfər Tağı altında məşəl, Milli məşəl" təşkilatının generalı Pol Moro (Paul Moreau), Azərbaycan səfiri Leyla Abdullayeva, səfirliyin hərbi attaşesi, polkovnik-leytenant Cavid Abdullayev, UNESCO yanında daimi nümayəndə Elman Abdullayev və tədbirin fəxri iştirakçılarına buradakı naməlum əsgər və əbədi məşəl haqqında məlumat verib.

Azərbaycanın Fransadakı səfiri Leyla Abdullayeva naməlum əsgərin məzarı önünə əklil qoyub və həlak olanların xatirəsinə şərəf meydanında əbədi məşəli alovlandırıb. Vətən uğrunda canlarından keçənlərin xatirəsi bir dəqiqəlik sükutla yad edilib. Orkestrin ifasında Azərbaycan və Fransanın Dövlət himnləri səsləndirilib.

Leyla Abdullayeva Zəfər Tağı altında fəxri kitaba ürək sözlərini yazıb. Səfir bayraqdarlara, eləcə də tədbirin iştirakçılarına təşəkkürünü bildirib və onlarla səmimi söhbət edib.

Tədbirdə Fransada Birinci və İkinci Dünya müharibələri qəhrəmanlarının xatirəsini əbədiləşdirən assosiasiya, federasiya və fondların rəhbərləri və nümayəndələri, fransız generallar, Parisdəki azərbaycanlı diplomatlar, UNESCO yanında daimi nümayəndəliyimizin diplomatları, Azərbaycan icmasının üzvləri iştirak ediblər.

Qeyd edək ki, “Zəfər Tağı altında məşəl, Milli məşəl” təşkilatı 1901-ci il qanunu ilə idarə olunan assosiasiyalar birliyidir və 500 yaxın assosiasiyanı birləşdirir. Könüllü əsasda fəaliyyət göstərən təşkilatın təşəbbüsü ilə keçmiş döyüşçülərin xatirəsinə yaradılmış 150 assosiasiyanın rotasiyası formatında hər axşam rəsmi şəkildə Vətən uğrunda həlak olanların xatirəsi anılır.