Bu gün tarix səhnəsinin bənzərsiz bir nöqtəsində - Şuşadayıq. Yeni dünya nizamının qurulduğu bir vaxtda Azərbaycan diplomatik, hərbi qələbələrə imza atıb.

Fact-info.az xəbər verir ki, bunu “Yeni dünya nizamı: geosiyasi aspektlər və qlobal çağırışlar” mövzusunda beynəlxalq konfransda Türkiyə-Azərbaycan parlamentlərarası dostluq qrupunun rəhbəri, Türkiyə Böyük Millət Məclisinin üzvü Şamil Ayrım deyib.

O bildirib ki, ötən əsrin 90-cı illərində Ermənistan tərəfindən işğal edilən Qarabağda tarixin ən amansız soyqırımı olan Xocalı qətliamı baş verib, bir milyona yaxın insan doğma yurdundan didərgin düşüb: “BMT-nin Qarabağla bağlı 4 qətnaməsi yeri yetirilmədi. Bəzi beynəlxalq təşkilatlar uzun müddət bu məsələ ilə bağlı ikili standartlar nümayiş etdirdilər. Nəhayət, 2020-ci ildə 44 günlük Vətən müharibəsindəki tarixi Qələbə və birgünlük lokal antiterror tədbirləri ilə Qarabağ və Şərqi Zəngəzur 30 illik erməni işğalından azad edildi, Azərbaycanın ərazi bütövlüyü və suverenliyi bərpa olundu”.

Şamil Ayrım təəssüflə vurğulayıb ki, bu gün bölgədə sülhün bərqərar olunmasını istəməyən bəzi qüvvələr regionu yenidən qarşıdurmaya sürükləmək üçün müxtəlif üsullara əl atırlar: “Həmin qüvvələr unutmasınlar ki, Azərbaycan Prezident, Müzəffər Ali Baş Komandan İlham Əliyevin rəhbərliyi ilə 44 günlük müharibədə tarixi Zəfər qazandı. Bu Qələbə tarixin, ədalətin qələbəsidir. 2021-ci il 15 iyun tarixində Şuşa şəhərində Azərbaycan Respublikasının Prezidenti İlham Əliyevin və Türkiyə Respublikasının Prezidenti Rəcəb Tayyib Ərdoğanın imzaladıqları “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” iki ölkə arasında dostluğun, qardaşlığın rəmzi olan son dərəcə qiymətli sənəddir. Hazırda işğaldan azad edilmiş ərazilərdə bərpa-quruculuq işləri uğurla davam edir. Yollar, körpülər, tunellər tikilir, iş yerləri açılır. Təbii ki, bu işləri Azərbaycan öz gücü, vəsaiti hesabına həyata keçirir”.