Xalq rəssamı Toğrul Nərimanbəyov müasir Azərbaycan təsviri sənətinin yetişdirdiyi böyük şəxsiyyətlərdən biridir. Bu gün bənzərsiz fırça ustası Toğrul Nərimanbəyovun vəfatından 12 il ötür. Fact-info.az AZƏRTAC-a istinadən xəbər verir ki, Azərbaycanın Fransadakı səfiri Leyla Abdullayevanın rəhbərliyi ilə səfirliyimizin diplomatları və qızı Əsmər Nərimanbəyova, eləcə də diaspora üzvlərimiz 95 yaşı bu il tamam olan T.Nərimanbəyovun Parisdə Passy qəbiristanlığındakı məzarını ziyarət ediblər.

Səfir Leyla Abdullayeva Xalq rəssamı Toğrul Nərimanbəyovun Azərbaycan təsviri sənətinin inkişafına, təbliğinə, eləcə də yaratdığı sənət nümunələri ilə milli təsviri sənət dünyamıza verdiyi töhfələrdən danışıb. Diplomat T.Nərminbəyovun valideynlərinin üzləşdiyi çətinliklərdən söz açaraq, asan olmayan həyat yolunu, ailənin yaşadığı çətinlikləri xatırladıb. T.Nərimanbəyovun atası Fərman Nərimanbəyovun Fransanın Tuluz Universitetində təhsil almasından, fransız modelyerlə evlənməsindən, geri döndükdə sovet repressiyasına məruz qalmasından, sürgünə göndərilməsindən danışıb.

Diplomat qeyd edib ki, ziddiyyətli, təzadlı illərdə inamını itirməyən Nərimanbəyovlar yaşamaq uğrunda mücadiləni davam etdiriblər. Əzim Əzimzadə adına Azərbaycan Dövlət Rəssamlıq Məktəbinə daxil olan T.Nərimanbəyov 1950-ci ildə Litva İncəsənət İnstitutunda monumental və dəzgah rəssamlığı fakültəsində təhsil alıb və eyni zamanda, Vilnüs Konservatoriyasında klassik vokalı öyrənib. Toğrul anası ilə yalnız tələbəlik illərində Səmərqənddə görüşdüyü, onun müxtəlif orqanlara çoxsaylı müraciəti və gərgin mübarizəsi sayəsində anasına bəraət verildiyi bildirilib. Ancaq uşaqlıqda üzləşdiyi əziyyətlər, ədalətsizliklər Toğrulun əzmkarlığını sındırmayıb və o, yaradıcılıq yolunda ən yüksək zirvələri fəth edib. Görkəmli rəssamın əsərləri bu gün dünyanın bir çox muzeylərində, fondlarında saxlanır.

Prezident İlham Əliyevin 2010-cu il 22 iyun tarixli Sərəncamı ilə görkəmli rəssamın 80 illik yubileyi dövlət səviyyəsində keçirildiyi və yubiley tədbirlərinin yalnız doğma Vətənində deyil, həmçinin ölkəmizin sərhədlərindən kənarda da qeyd edildiyi diqqətə çatdırılıb.

Diplomat vurğulayıb ki, Toğrul Nərimanbəyov Fransa Müasir İncəsənət Ensiklopediyasında haqqında məlumat verilən yeganə azərbaycanlıdır.

Azərbaycanın Əməkdar rəssamı, Toğrul Nərimanbəyovun qızı Əsmər Nərimanbəyova atasının həyatından danışaraq, onunla bağlı, eləcə də ABŞ, Almaniya, İngiltərə, Çexiya, Rusiya, Hindistan, Fransa, Litva kimi bir çox ölkələrdə fərdi sərgiləri ilə bağlı xatirələrini bölüşüb.