21 fevral  2025-ci il tarixində İqtisadi Resursların Öyrənilməsi ictimai birliyinin (SER), Türkiyə İslam Sığortaçılığı Dərnəyinin (KATSİDER) və Azərbaycan Sığortaçılar Assosiasiyasının (ASA) birgə tərəfdaşlığı və Alizadeh şirkətinin təşkilati dəstəyi ilə “İslam Sığortası – Təkaful” mövzusunda sertifikatlı təlim proqramı  keçirilib.

ASA-nın icraçı direktoru Elmar Mirsalayevin, SER-in sədri  i.f.d. Ruslan Atakişiyevin  və Alizadeh şirkətinin direktoru Kazım Mustafazadənin  açılış nitqlərindın sonra söz Türkiyədən dəvət olunmuş Türkiyənin ilk İslam sığortası şirkəti olan Neova Sığortanın həmtəsisçisi Dr. Yunus Emre Gürbüzə verildi.

Dr. Y.E. Gürbüz “İslam sığortası – Təkafulun mahiyyəti, dövlət nəzarəti və tənzimlənməsi, şəriətə uyğunluğun idarə olunması kimi mözularda çıxış edib. Bundan sonra O, Türkiyə timsalında həyat və qeyri-həyat sığorta, həyat təqaüd, təkrar sığorta məhsul istiqamətlərindən danışdı. O, bildirdi ki, Türkiyə İslam sığorta bazarında İslam sığorta şirkətlərinin sayı artıq 15-ə yaxın, onların payı isə 7%-ə çatmışdır. Əsas məhsullar içərisində Kasko, Qəza, kənd təsərrüfatı, yanğın, təbii fəlakət sığortaları olmuşdur. Neova, Bərəkət, Unico, Doğal və s. İslam sığorta şirkətlərindən praktiki misallar gətirmişdir.

 Təlimdə Azərbaycan Mərkəzi Bankının əməkdaşları, Qala sığorta, Azərbaycan Sənaye sığortası, Atəşgah sığorta, ATB bankın nümayəndələri, sahibkarlar və elmi işcilər iştirak edib. İştirakçıları maraqlandıran suallar cavablandırılıb. Sonda xatirə şəkli çəkilib.

********************  

22-23 fevral  2025-ci il tarixlərində Kiçik və Orta Biznesin inkişafı Agentliyinin Bakı KOB evində İqtisadi Resursların Öyrənilməsi ictimai birliyinin (SER) və Türkiyənin İslam İqtisadiyyatı Araşdırma Mərkəzinin (İKAM) birgə tərəfdaşlığı və “Alizadeh” şirkətinin təşkilati dəstəyi ilə 2 günlük “İslam iqtisadiyyatı və maliyyəsinə ümumi baxış” mövzusunda sertifikatlı təlim proqramı keçirilib.

Tədbirə  İqtisadi Resursların Öyrənilməsi Mərkəzinin sədri i.f.d. Ruslan Atakişiyevin açılış nitqiylə başlanılıb. Sonra söz  “Alizadeh” şirkətinin direktoru Kazım Mustafazadəyə verilmişdir.

Təlim 2 modulda təşkil olunub.  I modulda  Mərmərə Universiteti İslam İqtisadiyyatı və Maliyyəsi İnstitutunun dosenti, Dr. Murat Yaş bir gün ərzində İslam maliyyə alətləri olan İcara, Murabaha, Muşarəkə, Mudarəbə, Salam, İstisna, Vəkalətə toxunmuşdur. O, həmçinin İslam istiqrazları olan Sukuk, İslam törəmə maliyyə alətləri, London, Dubay, Malayziya Fond bazarlarında İslam qiymətli kağızlarının alqı – satqısından danışmışdır.

Tədbirin ikinci günü keçirilən II modulda isə İKAM-ın direktoru Dr. Melih Turan Türkiyədə İslam bankçılığının mövcud vəziyyətinə, İslam  Fintexlərinə yer ayırmışdır. Burada İslam banklarının rəqəmsal həllərinə, mobil tətbiqlərinə, Kraudfandinq, e-ticarət ödəmə sistemlərinə, Halal pay, elektron kassa, mobil investsiya kimi  Fintex alətlərinə diqqət yetirilmişdir.  

Tədbirin müzakirəsi zamanı yuxarıda sadalanan məhsulların tətbiqi imkanları müzakirə olunaraq bu istiqamətdə bir sıra şirkətlərin açılması təklif olunmuşdur.

Tədbirdə 30-a yaxın müxtəlif qurumlardan maliyyəçi, bank işciləri, elmi işcilər, sahibkarlar iştirak edib.

Sonda iştirakçılara sertifikatlar təqdim olunub, xatirə şəkli çəkdirilib.

Fact-info.az