“Çıxışıma 33 il əvvəl bu günlərdə baş vermiş Xocalı soyqırımı qurbanlarının xatirəsini ehtiramla yad etməklə başlamaq istəyirəm. Ermənistan tərəfindən törədilən bu qətliam nəticəsində 600-dən çox azərbaycanlı mülki şəxs amansızcasına qətlə yetirilib. Bu günlərdə biz həmin cinayəti törədənlərin bəzilərinin ədalət məhkəməsi qarşısına çıxarılmaları və Xocalı faciəsinin sağ qalmış qurbanlarının 30 illik işğaldan sonra öz evlərinə qayıda bilmələri ilə təsəlli tapırıq”.

Fact-info.az  xəbər verir ki, bu fikirləri Azərbaycanın ATƏT PA-dakı nümayəndə heyətinin rəhbəri Qaya Məmmədov qurumun Vyanada keçirilən qış sessiyasında səsləndirib.

Bildirilib ki, Azərbaycanın öz ərazilərini azad etməsi hazırkı dünyada ədalətin bərqərar edilməsinin nadir nümunələrindən biridir və bölgədə davamlı sülhə yol açır. Lakin bu yolda hələ də çətinliklər mövcuddur. Ermənistan sözdə sülh sənədi imzalamaq istədiyini bildirir, Azərbaycan isə həqiqi sülhə nail olmaq istəyir: “Ermənistanın sürətlə və kütləvi şəkildə silahlanması, maneəsiz tranzit öhdəliklərini yerinə yetirməkdən imtina etməsi və vətənlərindən qovulmuş Qərbi azərbaycanlıların öz evlərinə qayıtmasına mane olması bizi ciddi şəkildə narahat edir. Bütün bunlar bir daha təsdiq edir ki, sülh yalnız kağız üzərində yazılmış sözlərdən ibarət olmamalıdır.“

Nümayəndə heyətinin rəhbəri diqqətə çatdırıb ki, ATƏT Avropa təhlükəsizliyi üçün mühüm bir mexanizm olaraq qalır, lakin o, öz qüsurlarını və keçmiş uğursuzluqlarını təhlil etməlidir. İkili standartlara, beynəlxalq hüququn selektiv şəkildə tətbiqinə və insan hüquqlarından siyasi məqsədlər üçün sui-istifadəyə yol verilməməlidir.