Etiraf etmək lazımdır ki, internet məkanı nə qədər inkişaf etsə də, televiziya öz gücünü saxlaya bilir. İnternet medianın, sosial şəbəkələrin belə sürətlə inkişaf etdiyi məqamda müxtəlif zövqlü tamaşaçını tamamilə razı salmaq təbii ki, çətindir. Amma kimin necə qəbul etməsindən asılı olmayaraq, televiziya hər bir kəsin düşüncəsində müəyyən iz qoyur.

14 fevral Azərbaycanda televiziyanın yaranma günündə bəzi narahatedici məqamlara yenidən nəzər salmaq istərdim. Teleməkanda ciddi problemlər hələ də qalmaqdadır. Ümumiyyətlə, telekanal tamaşaçıya ağıl öyrətmək yox, maarifçilik işi ilə bərabər hər evə xoş aura gətirməlidir. Qıcıq doğuracaq yüngül şoularla, maraqsız və baxılması qəliz olan seriallarla kövrək cəmiyyəti ovundurmaq, əyləndirmək çətindir. Bu məsələdə ən azından balansı qorumaq lazımdır.

Yaxşı sənət, gözəl musiqi, bəşəriyyətə xidmət edən elm əslində sərhəd tanımır. Hər bir xalqın sərvətinə çevrilir. Təəssüf ki, indi telekanallar strateji cəhətdən millətə ziyan gətirəcək verilişlərə üstünlük verirlər. Ailə, məişət məsələləri, arvad boğuşmaları və digər ər-arvad çəkişmələri televiziya verilişinin müzakirəsinə çevrilməməlidir. Əgər belə problemlər mövcuddursa, onun həlli ilə məşğul olan dövlət qurumları var. Deməli, həmin dövlət qurumları öz işi ilə layiqincə məşğul olmadığına görə, bu rüsvayedici məsələlər televiziyada gündəmə gətirilir. Peşəkar teletəndiqin və hər hansı hüquqi məsuliyyətin olmaması, millətin və dövlətin strateji maraqlarına zərbə vuracaq ailə məsələlərinin telekanallarda müzakirəsinə rəvac verir.

Burada tv-lərin məqsədi belə həssas məqamları ortalığa atmaqla geniş auditoriya toplamaq və çoxlu reklamlar əldə etməkdir. Bu gün təəssüf doğuran odur ki, belə verilişlər bu yolla auditoriya toplaya bilir. Həmin auditoriyanın zövqü və intellektual səviyyəsinin necə olmasının heç bir əhəmiyyəti yoxdur.

Düşünürəm ki, dövlətimiz bu qorxulu tendensiyanın aradan qaldırılması istiqamətində təcili addımlar atmalıdır. Həmçinin reklam bazarının inkişafı və peşəkar səviyyədə tənzimlənməsi ilə bağlı zəruri işlər görülməlidir. Reklam məsələsi geniş mövzudur. Bu strateji sahə geniş araşdırılmalı və problemlər həll olunmalıdır.

Onu da etiraf etmək lazımdır ki, televiziyanın birbaşa tamaşaçının istəyinə, zövqünə uyğun proqram hazırlaması özü-özlüyündə mənfi tendensiyalara yol açar. Ancaq balansı qoruyaraq, teleticarət işini quraraq əsas milli strateji hədəflərə doğru getmək mümkündür.

Əkrəm Bəydəmirli