Azərbaycanın ləyaqətli, qorxmaz və vətənpərvər oğullarından söhbət düşəndə Əlif Hacıyevin də adı hörmətlə çəkilir. Əlif Lətif oğlu Hacıyev 1953-cü il iyun ayının 24-də Qarabağın dilbər guşələrindən olan Xocalıda doğulub. O, uşaq yaşlarından zəhmətə alışmışdı. 1970-ci ildə orta məktəbi bitirmiş, Xankəndi şəhərindəki peşə məktəblərindən birində sürücülük peşəsinə yiyələnmişdi. 1971-1973-cü illərdə keçmiş Sovet Ordusu sıralarında həqiqi hərbi xidmətdə olmuşdur. O, 1976-cı ildə SSRİ DİN Frunze adına Xüsusi Orta Milis Məktəbinə daxil olmuş, 1979-cu ildə bu təhsil ocağını bitirmişdir. 1981-ci ildə təhsilini SSRİ DİN-in Milis (Polis) Akademiyasında davam etdirmişdir. O, Dağlıq Qarabağda milis(polis) əməkdaşı olaraq işlədiyi zaman erməni terrorçularına və onların havadarlarına qarşı çox amansız idi. Buna görə saxta ittihamlarla Ə.Hacıyevi həbs etdilər. Cəsur insan 10 il müddətinə azadlıqdan məhrum edildi.1987-ci ildə Ə.Hacıyevin cəzasına baxıldı.Onun cəzası 10 ildən 6 ilə endirildi. Daha sonra isə bəraət aldı və azadlığa çıxdı. 1990-cı ildə Azərbaycan Respublikası DİN Rəhbərliyi tərəfindən o, polis orqanlarına bərpa edildi. Əlif bəy Xocalı Hava Limanı Xətt Daxili İşlər Bölməsinə rəis təyin edildi. 1991-ci ildə nümunəvi xidmətlərə görə növbədənkənar mayor rütbəsi aldı.

Həqiqətən də bu insanın gözündə qorxu yox idi. Çalışırdı ki, ən çətin əməliyyatlarda özü iştirak etsin.

1992-ci il fevralın 25-dən 26-a keçən gecə Xocalı soyqırımı baş verəndə cəsur komandir Ə.Hacıyev iş başında idi.Düşmən tərəf öz din qardaşlarının köməyilə hər tərəfdən Xocalıya doğru hücuma keçmişdilər. Əlif bəy rəhbərlik etdiyi dəstə ilə səhər saat 5-ə kimi erməni terrorçularına qarşı mübarizə apardı. O, silahdaşları Tofiq Hüseynov, Aqil Quliyev, Füzuli Rüstəmov, Araz Səlimov və digər şəxslərlə birlikdə dinc əhalinin Ağdam istiqamətinə çatdırılması üçün var qüvvəsilə çalışırdı. Avtomatın qundağında güllələr qurtarmışdı. Onu dəyişən zaman qəfildən açılan atəş nəticəsində şəhid oldu. Düşmən tərəf Ə.Hacıyevin meyidini tapana və ya onu sağ ələ keçirənə pul mükafatı verəcəyini bildirmişdi. İgid oğullarımızın sayəsində həm Əlif Hacıyev, həm də, Tofiq Hüseynov, Aqil Quliyev, Füzuli Rüstəmov .kimi qəhrəman oğulların meyidləri savaş meydanından çıxarıldı. Dövlət Başçısının Fərmanı ilə onların hər birinə Azərbaycanın Milli Qəhrəmanı adı verildi. Əlif Hacıyev ailəli idi, iki övladı yadigar qalıb: Zərinə və İradə.Ailəsi hazırda Bakıda yaşayır. Bakının Nizami rayonundakı küçələrdən birinə Əlif Hacıyevin adı verilib.

Ruhu şad, məkanı Cənnət olsun. Amin.

Şamil Sabiroğlu, jurnalist.