Boğulmazdır millətimin haqq səsi,

Çünki haqla yoğrulub hər kəlməsi,

Ərşə yetər qoç Koroğlu nərəsi,

Gömülməzdir bayraqdarı xalqımın,

Sınanmışdır oğulları xalqımın.

Ər igidlər meydanlara sığındı,

Vətən daha qoy çəkməsin sıxıntı,

Məramımız rəbbimizə yaxındı,

Devrilməzdi iqtidarı xalqımın,

Sınanmışdır oğulları xalqımın.

Odlar yurdu tapdandı, parçalandı,

Torpaq üstə göz yaşı, qan calandı,

Yetər daha əzildik, haçalandıq...

Bölünməzdir ixtiyarı xalqımın ,

Sınanmışdır oğulları xalqımın.

Hədə-qorxu sındırmadı qüdrətin,

Min bir sitəm boğammadı hiddətin,

Diz çökmədi, alçaltmadı şöhrətin,

Bükülməzdir dağ vüqarı xalqımın,

Sınanmışdır oğulları xalqımın.

Nəhs illərin ləkəsi var üzümdə,

Didərginlik kölgəsi var gözümdə,

Ölkə varmı Azərbaycan dözümlə?!

Yenilməzdir ilk baharı xalqımın,

Sınanmışdır oğulları xalqımın.

Müjdələr dolusu növrağımız var,

Üç rəngli əbədi bayrağımız var,

Gör nə bərəkətli torpağımız var,

Tükənməzdir xoş nübar xalqımın,

Qəhrəmandır oğulları xalqımın.!!!

Ağatahir Cəbirli

AYB-nin üzvü, Şair-publisist, "Qızıl Qələm " mükafatı laureatı

21.01.1990