Yanvarın 10-da YARAT Müasir İncəsənət Məkanın dəstəyi ilə XX-XXI əsr Azərbaycan Rəngkarlığı Muzeyində YARAT Müasir İncəsənət Məktəbinin ikinci buraxılış tələbələrinin “Sonluqdan sonsuzluğa” yekun sərgisinin açılış mərasimi keçirilib.

YARAT Müasir İncəsənət Məktəbi Əməkdar rəssam Sabina Şıxlinskayanın müəllifliyi ilə bir il müddətində müasir incəsənətin fundamental istiqamətləri üzrə multidisiplinar rəssamlar, incəsənət üzrə menecerlər, kuratorlar və incəsənət tədqiqatçıları üçün nəzəri və praktiki təhsil proqramlarını uğurla bitirib. Yekun nəticə olaraq, 30 tələbə proqramın müxtəlif incəsənət sahələrinə yiyələnərək, 4 fərqli buraxılış layihələrini hazırlayıblar.

Əməkdar rəssam Sabina Şıxlinskaya bildirib ki,  bu sərgi tələbə art-menecerlərinin təşkilatçılığı ilə tələbə kuratorların və rəssamların bədii ifadələrini bir araya gətirir. Ekspozisiyanı formalaşdıran dörd kurator layihəsinin mərkəzində bu məktəbin rəhbəri Sabina Şıxlinskayanın “sonluğu sonsuzluğa çevirmək cəhdi ilə üfüqə doğru hərəkət” konsepsiyası dayanır. Hegel fəlsəfəsinin dialektik arqumentasiya metoduna görə, hərəkət bizi qaçılmaz olaraq başladığımız nöqtəyə gətirib çıxarır. Beləliklə, biz “sonsuz sayda sonluqlar” ilə qarşılaşırıq. Lakin sonluqlar bu sərhəddə daim qeyb olurlar. Həqiqi sonsuzluq özündə iki əsas aspekti birləşdirir: sonsuzluğun özü və daim formalaşan sonluq. Bu sonsuzluqda sonluq yox olur və yalnız həqiqi sonsuzluq, yəni öz-özlüyündə mövcud olan varlıq qalır, çünki artıq başqa heç nə mövcud olmur.

Hegelin “sonluq yalnız öz təbiəti vasitəsilə sonsuzluğa çevrilməkdən ibarətdir” dünyagörüşü paradiqmasının mahiyyəti müasir dövrün fəlsəfi meyilləri ilə bir çox cəhətdən uyğunluq təşkil edir.

Metamodernizmin praqmatik romantizmi, sonsuza uzaqlaşan üfüqü izləməyə cəhd göstərərkən, bir-birinə zidd keyfiyyətləri eyni anda birləşdirir: məntiqi ardıcıl və absurd, ciddi və uğursuzluğa məhkum, lakin yenə də nikbin və ümidlərlə dolu. Anlayaraq ki, titrəmələr təbii dünya nizamıdır, məhdudiyyətlər isə hər bir hərəkətə və qavrayışa xasdır. Müasir texnologiyaların imkanları isə bizə dünyanı müxtəlif baxış bucaqlarından görməyə şərait yaradaraq, eyni anda həm futurist, həm də keçmişə nostalji ilə baxan bir mövqedə dayanmağa imkan verir.

Müasir insanın aktual mövcudluğu, özünün həqiqi mənasında, iki qütb arasındakı gərginlikdən – dünyəvi və ilahi, mükəmməl və natamam, həqiqət və yalan, nizam və xaosdan qaynaqlanan bir vəziyyət kimi açılır. Bu mövcudluq, “indinin sərhədlərini gələcəyin imkanlarına doğru dəyişməklə” öz ifadəsini tapır. Sonsuza uzaqlaşan üfüqün ardınca qaçmaq isə məhz müasir insanın qismətidir.

Qeyd edək ki, sərgi fevralın 2-dək davam edəcək.